कर्मवीरांचे आयुष्य व विचार पुढील पिढ्यांना प्रेरणादायी
कर्मवीर भाऊराव पाटील यांनी जातपात भेद विरहित शिक्षण व्यवस्था निर्माण करून गोरगरीब मुलांना शिक्षणाच्या प्रवाहात आणण्याचे काम केले. त्यांचे आयुष्य व विचार पुढील अनेक पिढ्याना प्रेरणादायी ठरतील असे विचार जेष्ठ सामाजिक विचारवंत शिवाजी राऊत यांनी व्यक्त केले. ते छत्रपती शिवाजी कॉलेज सातारा येथे कर्मवीर भाऊराव पाटील यांच्या 137 व्या जयंती कार्यक्रमानिमित्त आयोजित विशेष व्याख्यान कार्यक्रमात बोलत होते. कर्मवीर अण्णांचे विचार त्यांचे शैक्षणिक तत्वज्ञान, श्रमप्रतिष्ठा, ज्ञानरचनावाद, सामाजिक निष्ठा, सत्यशोधक विचारांचा आदर्श, शैक्षणिक क्षेत्रातील त्यागी व निस्पृह आयुष्य या विविध अंगाचा आढावा त्यांनी घेतला.
यावेळी कार्यक्रमाचे प्रास्ताविक प्रा.डॉ. मनोहर निकम यांनी केले. अण्णांच्या उत्तुंग व्यक्तिमत्वाविषयी माहिती देऊन कार्यक्रमाच्या पाहुण्यांचा परिचय त्यांनी करून दिला. कार्यक्रमाचे अध्यक्ष व महाविद्यालयाचे प्राचार्य तसेच रयत शिक्षण संस्थेचे ऑडिटर विभागाचे सहसचिव डॉ. राजेंद्र मोरे यांनी अध्यक्षीय मनोगत व्यक्त केले तर कार्यक्रमाचे समन्वयक प्रा. शरद ठोकळे यांनी आभार मानले . कार्यक्रम यशस्वी करण्यासाठी इतिहास विभाग प्रमुख प्रो. डॉ. धनाजी मासाळ यांनी मार्गदर्शन केले. तर डॉ. विकास येलमार, डॉ. डी. डी. कोरडे, प्रा. कबीर वाघमारे, प्रा. एम.डी. चिंदे,प्रा. आर.जे. लोखंडे, प्रा. निलेश जमदाडे यांनी कार्यक्रमाच्या यशस्वी आयोजनासाठी अनमोल सहकार्य केले.प्रा.डॉ.सीमा कदम व विद्यार्थिनी प्रीती वाघमारे, श्रावणी झांजुर्णे यांनी सूत्रसंचालन केले.
