यशोदा टेक्निकल कॅम्पसला इंटर्नशिपमधील उत्कृष्ट कामगिरीबद्दल पाच पुरस्कार
सातारा : विद्यार्थ्यांना उद्योगाभिमुख शिक्षण, अत्याधुनिक तंत्रज्ञानाचा प्रत्यक्ष अनुभव आणि रोजगारक्षम कौशल्ये मिळावीत, यासाठी सातत्याने राबविण्यात येणाऱ्या विविध उपक्रमांची दखल घेत यशोदा टेक्निकल कॅम्पस, सातारा यांना एज्यु स्किल्सच्या वतीने एकूण पाच प्रतिष्ठेचे पुरस्कार प्राप्त झाले आहेत. इंटर्नशिपच्या माध्यमातून विद्यार्थ्यांना उपलब्ध करून दिलेल्या संधी, सेंटर ऑफ एक्सलन्सची प्रभावी अंमलबजावणी आणि विद्यार्थ्यांच्या तांत्रिक कौशल्यविकासासाठी केलेल्या उल्लेखनीय कार्याची या पुरस्कारांच्या माध्यमातून दखल घेण्यात आली आहे.
एज्यु स्किल्स यांच्या वतीने जयपूर येथे आयोजित करण्यात आलेल्या एचआर समिट २०२६ मध्ये या पुरस्कारांचे वितरण करण्यात आले. राजस्थानचे राज्यपाल हरिभाऊ बागडे, केंद्रीय सामाजिक न्याय राज्यमंत्री रामदास आठवले तसेच शिक्षण, उद्योग, तंत्रज्ञान आणि कौशल्य विकास क्षेत्रातील विविध मान्यवरांच्या उपस्थितीत हा पुरस्कार सोहळा संपन्न झाला.
यशोदा टेक्निकल कॅम्पसला प्राप्त झालेल्या पुरस्कारांमध्ये झेडस्केलर (Zscaler) सेंटर ऑफ एक्सलन्स आणि मायक्रोचिप (Microchip) सेंटर ऑफ एक्सलन्स यांच्या माध्यमातून विद्यार्थ्यांना अत्याधुनिक तंत्रज्ञानाचे प्रशिक्षण व प्रत्यक्ष अनुभव उपलब्ध करून दिल्याबद्दल दोन पुरस्कारांचा समावेश आहे. त्याचबरोबर ‘बेस्ट परफॉर्मिंग इंजिनिअरिंग इन्स्टिट्यूट’ हा प्रतिष्ठेचा पुरस्कारही यशोदा टेक्निकल कॅम्पसला प्रदान करण्यात आला.
विद्यार्थ्यांसाठी गुणवत्तापूर्ण इंटर्नशिपच्या संधी उपलब्ध करून देणे, उद्योगविश्वाशी प्रभावी समन्वय साधणे आणि विद्यार्थ्यांना प्रत्यक्ष कामाचा अनुभव मिळवून देण्याच्या क्षेत्रातील उल्लेखनीय योगदानाबद्दल इलेक्ट्रिकल इंजिनिअरिंग विभागाला ‘एक्सलन्स इन इंटर्नशिप ऑपॉर्च्युनिटीज’ हा विशेष पुरस्कार मिळाला. याशिवाय इंटर्नशिप व कौशल्यविकासाच्या क्षेत्रातील एकूण उत्कृष्ट कामगिरीची दखल घेत यशोदा टेक्निकल कॅम्पसला आणखी एक पुरस्कार प्राप्त झाला. अशा प्रकारे संस्थेच्या विविध विभाग व उपक्रमांच्या उत्कृष्ट कामगिरीमुळे एकूण पाच पुरस्कारांनी यशोदा टेक्निकल कॅम्पसचा गौरव झाला आहे.
यशोदा टेक्निकल कॅम्पसमध्ये विद्यार्थ्यांना केवळ अभ्यासक्रमापुरते मर्यादित न ठेवता त्यांना उद्योगाच्या बदलत्या गरजांनुसार तयार करण्यावर विशेष भर दिला जातो. विविध नामांकित कंपन्या व तंत्रज्ञान संस्थांच्या सहकार्याने सेंटर ऑफ एक्सलन्स, इंटर्नशिप, इंडस्ट्री इंटरफेस, तज्ज्ञ मार्गदर्शन, प्रात्यक्षिक प्रशिक्षण आणि कौशल्यविकासाच्या विविध उपक्रमांची प्रभावी अंमलबजावणी केली जात आहे. त्यामुळे विद्यार्थ्यांना आधुनिक तंत्रज्ञानाची ओळख होण्याबरोबरच प्रत्यक्ष औद्योगिक वातावरणाचा अनुभव मिळत आहे.
या उल्लेखनीय यशाबद्दल यशोदा शिक्षण संस्थेचे अध्यक्ष प्रा. डॉ. दशरथ सगरे आणि उपाध्यक्ष प्रा. डॉ. अजिंक्य सगरे यांनी यशोदा टेक्निकल कॅम्पसच्या संचालक, सहसंचालक, प्राचार्य, विभागप्रमुख, प्राध्यापक, ट्रेनिंग व प्लेसमेंट विभाग तसेच सर्व विद्यार्थ्यांचे अभिनंदन करून शुभेच्छा दिल्या. विद्यार्थ्यांच्या सर्वांगीण विकासासाठी उद्योगाभिमुख शिक्षण, तंत्रज्ञानाधारित प्रशिक्षण आणि जागतिक दर्जाच्या इंटर्नशिपच्या संधी भविष्यातही अधिक व्यापक प्रमाणात उपलब्ध करून देण्याचा संस्थेचा प्रयत्न राहील, असे त्यांनी सांगितले.
यशोदा टेक्निकल कॅम्पसच्या या यशामुळे सातारा जिल्ह्यातील तांत्रिक शिक्षण क्षेत्राच्या शिरपेचात आणखी एक मानाचा तुरा रोवला गेला असून, उद्योगाभिमुख आणि कौशल्याधारित शिक्षण देणारी संस्था म्हणून यशोदा टेक्निकल कॅम्पसची ओळख अधिक अधोरेखित झाली आहे.
