साताऱ्याचा सुपुत्र आता दिल्ली मेट्रोचा ‘सुरक्षा कवच’ –आयपीएस संतोष चाळके यांची नियुक्ती!
राजस्थान गाजवलं, आता दिल्ली मेट्रो सुरक्षित करणार; सातारच्या सुपुत्राची मोठी झेप!
कर्तृत्वाचा ‘मेट्रो’ प्रवास साताऱ्याच्या मातीतील जिद्द आणि दिल्लीचे मैदान
भुईंज (पत्रकार महेंद्रआबा जाधव)आपल्या तडफदार कामगिरीने प्रत्येक जबाबदारी यशस्वीपणे पार पाडणारे आय. पी. एस. अधिकारी संतोष चाळके यांची दिल्ली मेट्रो कॉर्पोरेशनच्या मुख्य सुरक्षा अधिकारीपदी नियुक्ती झाली आहे.
साताऱ्याच्या मातीने देशाला अनेक शूरवीर आणि सनदी अधिकारी दिले आहेत. याच परंपरेतील चाळकेवाडी ता. जि. सातारा गावातील एक झळाळते नाव म्हणजे आयपीएस संतोष चाळके. आपल्या २२ वर्षांच्या प्रदीर्घ कारकिर्दीत त्यांनी केवळ गुन्हेगारांवर वचक बसवला नाही, तर ‘जनतेचा पोलीस’ ही आपली प्रतिमा सार्थ ठरवली.
-राजस्थानमध्ये पोलीस अधीक्षक असताना त्यांनी केलेल्या धडाकेबाज कारवाया आजही तिथली जनता विसरलेली नाही. आधुनिक तंत्रज्ञानाची जोड आणि थेट जनसंपर्क ही त्यांची कार्यशैली त्यांना इतरांपेक्षा वेगळे ठरवते.
सीबीआय आणि सीआयएसएफ सारख्या प्रतिष्ठित संस्थांमध्ये डीआयजी म्हणून आपला ठसा उमटवल्यानंतर, आता त्यांच्याकडे दिल्ली मेट्रोच्या ७५ लाख प्रवाशांच्या सुरक्षेची जबाबदारी सोपवण्यात आली आहे. १३ हजार जवानांचे नेतृत्व करताना सातारचा हा सुपुत्र पुन्हा एकदा आपली ‘तडफदार’ ओळख सिद्ध करेल यात शंका नाही.
आयपीएस संतोष चाळके यांची दिल्ली मेट्रोच्या मुख्य सुरक्षा अधिकारीपदी झालेली नियुक्ती ही केवळ साताऱ्यासाठीच नाही, तर संपूर्ण महाराष्ट्रासाठी अभिमानाची गोष्ट आहे.
