कराड तालुक्यातील येळगाव फाटा मार्गावर वीज खांबाचे निकृष्ट काम
कराड प्रतिनिधी –कराड तालुक्यातील येळगाव फाटा ते येळगाव दरम्यान महावितरण तर्फे उभारण्यात आलेल्या वीज खांबांचे काम अत्यंत निकृष्ट दर्जाचे झाल्याचे समोर आले आहे. अनेक वेळा तक्रारी व वृत्तपत्रांमधून बातम्या प्रसिद्ध होऊनही संबंधित प्रशासनाने याकडे दुर्लक्ष केल्याचा आरोप नागरिकांकडून होत आहे.
या मार्गावर अनेक ठिकाणी वीज खांब थेट गटारातच उभे करण्यात आलेले दिसून येत आहेत, तर काही खांब गटाराच्या कडेला धोकादायक स्थितीत बसवण्यात आले आहेत. उभारण्यात आलेल्या खांबांच्या पायाभूत काँक्रीटला तडे गेलेले असून काम करताना योग्य प्रकारे पाण्याचा वापरही करण्यात आलेला नसल्याचे प्रथमदर्शनी स्पष्ट होते. त्यामुळे या खांबांची टिकाऊपणा संशयास्पद ठरत आहे.
कंत्राटदारांना मोठे करण्याच्या नादात निकृष्ट दर्जाची कामे मोठ्या प्रमाणात होत असल्याची चर्चा परिसरात रंगली आहे. या प्रकारामुळे भविष्यात वीज खांब कोसळण्याचा धोका निर्माण होऊन नागरिकांच्या सुरक्षेचा प्रश्न निर्माण झाला आहे.दरम्यान, संबंधित विभागाने या प्रकरणाची तात्काळ चौकशी करून दोषींवर कारवाई करावी तसेच कामाची सखोल तपासणी करून आवश्यक दुरुस्ती करावी, अशी मागणी ग्रामस्थांकडून जोर धरत आहे.
