महाबली पैलवान तथा छत्रसाल आखाड्याचे प्रमुख माननीय सतपाल सिंग (दिल्ली) यांची पै. जीवन कापले यांच्या निवासस्थानी सदिच्छा भेट
सातारा -सातारा येथे दिमाखात संपन्न झालेल्या हिंदकेसरी कुस्ती स्पर्धेनंतर पद्मश्री, पद्मविभूषण, हिंदकेसरी, भारत केसरी, रुस्तुम-ए-हिंद, ऑलिम्पिक वीर असे भारतातील कुस्ती क्षेत्रातील सर्वोच्च मानाचे किताब पटकावणारे महाबली पैलवान तथा दिल्ली येथील प्रसिद्ध छत्रसाल आखाड्याचे प्रमुख माननीय सतपाल सिंग यांनी पै. जीवन कापले यांच्या निवासस्थानी सदिच्छा भेट देत भोजनाचा आस्वाद घेतला. भारताला सुशील कुमार, योगेश्वर दत्त यांच्यासारखे ऑलिम्पिक पदक विजेते मल्ल घडविणारे गुरु म्हणूनही त्यांचा देशभर गौरव केला जातो.
या प्रसंगी महान महाराष्ट्र केसरी माणिक पवार, महाराष्ट्र केसरी सुधीर नाना पवार तसेच सातारा जिल्हा तालीम संघाचे पदाधिकारी व कुस्तीप्रेमी उपस्थित होते. कुस्ती परंपरा, मातीशी असलेले नाते, आखाड्याची संस्कृती आणि नव्या पिढीतील मल्लांना घडविण्याबाबत मनमोकळ्या चर्चा रंगल्या.
यावेळी सतपाल सिंग यांनी साताऱ्यात अत्यंत भव्य, शिस्तबद्ध आणि उत्साहपूर्ण वातावरणात पार पडलेल्या हिंदकेसरी कुस्ती स्पर्धेबद्दल गौरवोद्गार काढले. महाराष्ट्राची कुस्ती परंपरा देशासाठी प्रेरणादायी असून साताऱ्याने केलेले आयोजन राष्ट्रीय स्तरावर आदर्शवत असल्याचे त्यांनी नमूद केले. ग्रामीण भागातील मल्लांना मिळणारे व्यासपीठ भविष्यात देशाला आंतरराष्ट्रीय स्तरावरील उत्कृष्ट खेळाडू देईल, असा विश्वासही त्यांनी व्यक्त केला.
या सदिच्छा भेटीत कुस्ती क्षेत्रातील जिव्हाळा, आपुलकी, परंपरेचा सन्मान आणि मातीवरील प्रेम अनुभवायला मिळाले. उपस्थितांनी माननीय सतपाल सिंग यांचा सत्कार करून त्यांच्या कार्याबद्दल कृतज्ञता व्यक्त केली.
