खेत बचाओ अभियानास शेतकऱ्यांचा उत्स्फूर्त प्रतिसाद १४८ गावांतील ५,५०० शेतकऱ्यांचा सहभाग
सातारा- कृषी विभागामार्फत जमिनीचे आरोग्य सुधारणे, रासायनिक खतांचा संतुलित वापर वाढवणे, जलसंधारण आणि शाश्वत नैसर्गिक शेतीचा प्रसार करणे या मुख्य उद्देशाने देशव्यापी ‘खेत बचाओ अभियान’ राबविण्यात येत आहे
कृषी विभागाच्यावतीने प्रकल्प संचालक ‘आत्मा’ अजय शेंडे यांच्या मार्गदर्शनाखाली २२ ऑक्टोबर ते १९ नोव्हेंबर २०२६ या कालावधीत १४९ जनजागृती कार्यक्रम आयोजित करण्यात आले. यामध्ये सातारा जिल्ह्यातील १४८ गावांमध्ये ५,५०० शेतकऱ्यांनी उत्स्फूर्त सहभाग नोंदवला आहे.
या अभियानांतर्गत कृषी विभाग, आत्मा आणि कृषी विज्ञान केंद्रांच्या समन्वयाने माती परीक्षणावर आधारित पोषण व्यवस्थापन, पीक अवशेष व्यवस्थापन (पेंढा न जाळणे), एकात्मिक अन्नद्रव्य व कीड व्यवस्थापन, प्रति थेंब अधिक पीक, शेतकरी आयडी अद्ययावत करणे आणि प्रधानमंत्री पीक विमा योजना या विषयांवर शेतकऱ्यांना मार्गदर्शन करण्यात आले.
मोहिमेचा एक भाग म्हणून १८ नोव्हेंबर २०२६ रोजी मौजे गुळुंब ता. वाई येथील राष्ट्रीय नैसर्गिक शेती अभियान व खेत बचाओ अभियानाअंतर्गत आत्मा सातारा आणि कृषी विज्ञान केंद्र, बोरगाव यांच्या संयुक्त विद्यमाने एकदिवसीय संस्था पातळीवरील शेतकरी प्रशिक्षणाचे आयोजन करण्यात आले होते. यात शेतकऱ्यांना रासायनिक खतांचा वापर बंद करून नैसर्गिक शेतीकडे वळवणे, खेत बचाओ अभियानाचेमहत्त्व, सेंद्रिय शेतीसाठी आवश्यक निविष्ठा निर्मिती याबाबत माहिती देऊन प्रत्यक्ष प्रात्यक्षिक करून दाखवले.




