हिलरेंज माध्यमिक विद्यालय भिलार येथे नवागतांचे जल्लोषात स्वागत; शैक्षणिक साहित्याचे वाटप
पांचगणी प्रतिनिधी –नवीन शैक्षणिक वर्षाच्या पहिल्या दिवशी, हिलरेंज माध्यमिक विद्यालय भिलार येथे इयत्ता ५ वी ते १० वीच्या वर्गात नवीन प्रवेश घेतलेल्या विद्यार्थ्यांचे अत्यंत उत्साही आणि चैतन्यमय वातावरणात स्वागत करण्यात आले.
शाळेच्या पहिल्या दिवशी संपूर्ण परिसर सुशोभित करण्यात आला होता. प्रवेशद्वारावर काढलेली आकर्षक रांगोळी, विद्यार्थी सेल्फी पॉइंट आणि विद्यार्थ्यांच्या लेझीमच्या तालावरील पारंपरिक सादरीकरणाने वातावरणात एक आगळावेगळा उत्साह निर्माण केला होता. या शानदार स्वागत समारंभाला संस्थेचे अध्यक्ष नितीन भिलारे, सचिव जतीन भिलारे, संस्थेच्या संचालिका डॉ. तेजस्विनी भिलारे आणि शाळेचे मुख्याध्यापक मुकुंद शिंदे उपस्थित होते.
शैक्षणिक साहित्याचे वाटप
शाळेत पाऊल ठेवणाऱ्या प्रत्येक नवीन विद्यार्थ्याचे शैक्षणिक वर्षाच्या सुरुवातीलाच प्रोत्साहन मिळावे म्हणून वही, पेन आणि नवीन पाठ्यपुस्तकांचे वाटप मान्यवरांच्या हस्ते करण्यात आले. नवीन पुस्तके हातात पडताच विद्यार्थ्यांच्या चेहऱ्यावरचा आनंद ओसंडून वाहत होता.
विद्यार्थ्यांना मार्गदर्शन करताना संस्थेच्या संचालिका डॉ. तेजस्विनी भिलारे म्हणाल्या,“नवीन वर्ष ही नवीन संधी आणि नवी स्वप्ने घेऊन येते. हिलरेंज माध्यमिक विद्यालयात येणारा प्रत्येक विद्यार्थी हा आमचा अभिमान आहे. केवळ पुस्तकी ज्ञान न देता विद्यार्थ्यांचा सर्वांगीण आणि व्यक्तिमत्त्व विकास साधण्यावर आमचा नेहमीच भर राहिला आहे. विद्यार्थ्यांनी वेळेचे नियोजन करून सातत्याने अभ्यास करावा आणि आपल्या शाळेचा व परिसराचा नावलौकिक वाढवावा.”
शाळेचे मुख्याध्यापक मुकुंद शिंदे म्हणाले,”शालेय जीवन हा आपल्या आयुष्याचा पाया असतो. इयत्ता ५ वी ते १० वी मधील प्रत्येक वर्ष विद्यार्थ्यासाठी महत्त्वाचे आहे. यशासाठी शिस्त, नियमितता आणि कठोर कष्टाला कोणताही पर्याय नाही. डिजिटल युगात तंत्रज्ञानाचा योग्य वापर करून विद्यार्थ्यांनी आपले शैक्षणिक ध्येय गाठावे. विद्यार्थ्यांच्या उज्ज्वल भविष्यासाठी सर्व शिक्षक आणि शाळा प्रशासन सदैव कटिबद्ध आहे.”
कार्यक्रमाचे सूत्रसंचालन संगीता खरात यांनी केले. तर शांताराम जाधव यांनी आभार मानले.या कार्यक्रमास सुजाता पारठे, विनायक बगाडे, कल्पेश गायकवाड, राजू मोरे, योगिता रांजणे,संतोष मालुसरे, पालक आणि बहुसंख्येने विद्यार्थी उपस्थित होते. अत्यंत सकारात्मक वातावरणात नवीन शैक्षणिक वर्षाची सुरुवात झाली.
