45 व्या वाढदिवसानिमित्त बाळासाहेब शिंगाडे यांची 45 किमी धाव; फिटनेसचा दिला प्रेरणादायी संदेश
फलटण, प्रतिनिधी : वाढदिवस साजरा करण्यासाठी केक कापणे किंवा विविध कार्यक्रमांचे आयोजन करण्याऐवजी फलटण रनर्स फाउंडेशनचे सदस्य तथा ढवळ येथील शिक्षक श्री. बाळासाहेब शिंगाडे यांनी आपल्या 45 व्या वाढदिवसानिमित्त 45 किलोमीटर धाव पूर्ण करून एक प्रेरणादायी आदर्श निर्माण केला.
10 जून 2026 रोजी पहाटे 3 वाजता विंचुर्णी फाटा, बिरदेव नगर येथून त्यांनी धावण्यास सुरुवात केली. अविरत धावत सकाळी 8 वाजेपर्यंत त्यांनी तब्बल 45 किलोमीटरचे अंतर यशस्वीरीत्या पूर्ण केले. वाढदिवसाचे औचित्य साधून राबविण्यात आलेल्या या उपक्रमातून त्यांनी निरोगी जीवनशैली, नियमित व्यायाम आणि फिटनेसचे महत्त्व अधोरेखित केले.
या विशेष धाव मोहिमेदरम्यान सहभागी धावपटूंसाठी हायड्रेशन व अल्पोपहाराची उत्तम व्यवस्था करण्यात आली होती. या उपक्रमात डॉ. प्रसाद जोशी, फलटण रनर्स फाउंडेशनचे अध्यक्ष डॉ. रविंद्र शिंदे, डॉ. महेश शिंदे, अनुजा त्रिपुटे मॅडम तसेच फलटण रनर्स फाउंडेशनचे सदस्य आणि सेलिब्रेट लाईफ ग्रुपचे सदस्य मोठ्या उत्साहाने सहभागी झाले. सर्वांनी श्री. शिंगाडे यांच्यासोबत धावत त्यांना वाढदिवसाच्या शुभेच्छा दिल्या.
श्री. बाळासाहेब शिंगाडे यांच्या या फिटनेसप्रेमी आणि समाजाला प्रेरणा देणाऱ्या उपक्रमाचे सर्व स्तरांतून कौतुक होत आहे. वाढदिवस साजरा करण्याची ही आगळीवेगळी पद्धत अनेकांना आरोग्यदायी जीवनशैलीचा संदेश देणारी ठरली आहे.
