गोव्यात दूधसागर नदीत ३ सख्ख्या भावांसह ४ विद्यार्थ्यांचा बुडून मृत्यू
गोव्यातून धक्कादायक आणि हृदयद्रावक घटना समोर आली आहे. दूधसागर नदीत महाविद्यालयीन शिक्षण घेणाऱ्या चार विद्यार्थ्यांचा बुडून मृत्यू झाला आहे. प्रसिद्ध दूधसागर धबधब्यापासून अवघ्या दोन किलोमीटर अंतरावर ही घटना घडली. मृतांमध्ये तीन सख्या भावांचा समावेश आहे. पाच जणांचा एक ग्रुप नदीवर पोहोण्यासाठी गेला असता शनिवारी (१३ जून) सकाळी दक्षिण गोव्यातील कुळे येथे ही घटना घडली.
रामण्णा परसू मादेर (१९), लक्ष्मण परसू मादेर (१९), हिराण्णा परसू मादेर (२१) असे मृत्यू झालेल्या चिखली गावातील तीन सख्ख्या भावांची नावे आहेत. तर, विजय सजिली (२०) असे या दुर्घटनेत मृत्यू झालेल्या वास्को येथील चौथ्या विद्यार्थ्याचे नाव आहे. यापैकी दोघेजण वास्को येथील खासगी महाविद्यालयात शिक्षण घेत होते.
सकाळी सव्वा दहाच्या सुमारास दूधसागर नदीत चार युवक बुडाल्याची माहिती पोलिसांना मिळाली. पोलिसांनी तात्काळ मेटावाडा, कुळे येथील घटनास्थळी धाव घेतली. प्रसिद्ध दूधसागर धबधब्यापासून दोन किलोमीटरच्या अंतरावर ही घटना घडली. पोलिसांना घटनास्थळी एका विद्यार्थ्याचा मृतदेह आढळून आला. मात्र, तिघांचा मृतदेह अद्याप बेपत्ता होता. पोलिसांनी दृष्टी जीवरक्षकांच्या मदतीने शोधकार्य सुरु केले. शोधकार्यानंतर अखेर तिघांचे मृतदेह आढळून आले.
युवक ट्रेनने प्रवास करत साडेनऊ ते दहाच्या सुमारास घटनास्थळी दाखल झाले. पोहोण्यासाठी पाण्यात उतरल्यानंतर पाण्याचा अंदाज न आल्यामुळे चार जणांचा मृत्यू झाला.
“उन्हाळी सुट्टी समाप्त झाल्यानंतर, थोड्याच दिवसात कॉलेज सुरु होणार होते. यापूर्वी पिकनिकला जाण्याचे त्यांनी ठरवले होते. पाच जणांनी दूधसागर नदीपर्यंत ट्रेकिंग करुन पोहोण्याचा आनंद घेण्याचे ठरवले. त्यानुसार शनिवारी त्यांनी ट्रेकिंगला सुरुवात केली. पण, पाण्याचा अंदाज न आल्याने चौघांचा बुडून मृत्यू झाला. स्थानिकांनी त्यांना वाचविण्याचा प्रयत्न केला, यात पाचपैकी एकाला वाचविण्यात यश आले पण चारजण दगावले. कुळे पोलिसांनी याप्रकरणी अनैसर्गिक मृत्यूची नोंद केली आहे”, अशी माहिती पोलिसांनी दिली.
