जागतिक वारसा कास पुष्प पठारावर स्वच्छता मोहीम; विद्यार्थ्यांचा उत्स्फूर्त सहभाग
सातारा – जागतिक नैसर्गिक वारसा स्थळ कास पुष्प पठार येथे आज स्वच्छता मोहिमेचे आयोजन करण्यात आले. सातारा वनविभागाच्या पुढाकारातून “कचरामुक्त कास पठार” या संकल्पनेतून राबविण्यात आलेल्या या उपक्रमात न्यू इंग्लिश स्कूल, सातारा येथील राष्ट्रीय हरित सेना व एनसीसीच्या विद्यार्थ्यांनी उत्स्फूर्त सहभाग नोंदवला.
या मोहिमेदरम्यान कास पठार परिसरातील मुख्य गेट ते चोरटका तसेच नवरा-नवरी डोंगर ते वेस्टर्न घाट हॉटेलपर्यंतच्या रस्त्याच्या दोन्ही बाजूंवरील कचरा गोळा करण्यात आला. याशिवाय चोरटका ते कासाणी पार्किंग परिसरातील कचऱ्याचेही संकलन करण्यात आले. गोळा केलेला सर्व कचरा एकत्र करून तो सातारा नगरपरिषदेच्या वाहनाद्वारे कचरा डेपोत पाठविण्यात येणार आहे.
या उपक्रमावेळी कास पठार कार्यकारी समितीचे अध्यक्ष उपस्थित होते. तसेच न्यू इंग्लिश स्कूलचे एनसीसी ऑफिसर कैलास बागल सर, मुख्याध्यापक कौस्तुभ वैद्य, उपमुख्याध्यापक खोमणे सर, पर्यवेक्षक कल्याणकर सर, सौ. अनिता कदम, सौ. राधिका देशपांडे यांची उपस्थिती होती. शाळेतील विद्यार्थी-विद्यार्थिनींनी मोठ्या संख्येने सहभाग घेत स्वच्छतेचे महत्त्व अधोरेखित केले.
वनविभागाकडून वनपाल राजाराम काशीद (रोहोट), उज्वला थोरात (बामनोली), वनरक्षक समाधान वाघमोडे (कास), प्रकाश शिंदे (रोहोट), जयंत निकम (खडगाव) यांनी सक्रिय सहभाग घेतला.
माननीय उपवनसंरक्षक अमोल सातपुते, सहाय्यक वनसंरक्षक (वनीकरण) प्रदीप रौंदळ व वनपरिक्षेत्राधिकारी जोपळे सर यांच्या मार्गदर्शनाखाली ही स्वच्छता मोहीम यशस्वीपणे पार पडली.या उपक्रमामुळे कास पठार परिसर स्वच्छ राखण्याबाबत जनजागृती होत असून पर्यावरण संवर्धनाचा महत्त्वपूर्ण संदेश देण्यात आला.
