केळघर -जावळी तालुक्यातील ओखवडी गावांतील चार शिक्षकांची केंद्रप्रमुख पदी निवड झाली असून एकाच वेळी चार शिक्षकांची केंद्र प्रमुख पदी निवड होण्याचे ओखवडी हे राज्यातील बहुदा एकमेव गाव असून या निवडीमुळे दुर्गम ओखवडी गावाच्या शिरपेचात मानाचा तुरा रोवल्याची भावना ग्रामस्थांनी व्यक्त केली आहे.
जावळी तालुक्यात शिक्षक म्हणून काम करणारे शशिकांत शेलार यांची खर्शी बारामुरे केंद्र प्रमुख पदी नियुक्ती झाली असून योगेश शेलार यांची कुडाळ केंद्रप्रमुख पदी नियुक्ती करण्यात आली असून आनंदा शेलार यांची महाबळेश्वर तालुक्यातील वाळणे केंद्रप्रमुख पदी नियुक्ती करण्यात आली आहे. तर रायगड जिल्ह्यातील पोलादपूर तालुक्यात शिक्षक म्हणून काम करणारे विक्रम पार्टे यांची पोलादपूर तालुक्यातील देवळे येथे केंद्रप्रमुख पदी नियुक्ती झाली आहे. एकाच वेळी ओखवडी गावांतील चार शिक्षकांची केंद्रप्रमुख पदी नियुक्ती होणे हे गावाच्या व या शिक्षकांच्या दृष्टीने अभिमानाचा क्षण आहे. ओखवडी हे गाव छोटेशे असले तरी अध्यात्मिक परंपरा जपणारे गाव असून गावाने याआधी एकीच्या जोरावर संत गाडगेबाबा ग्रामस्वच्छता अभियान, निर्मल ग्राम योजना, तंटामुक्त योजना या योजनासह शासनाच्या विविध अभियानामध्ये सक्रिय सहभाग नोंदवून अनेक पुरस्कार मिळवले आहेत.
केंद्रप्रमुख पदी नियुक्ती झालेले हे चारही शिक्षक सर्वसामान्य शेतकरी कुटुंबातील असून उपक्रमशील शिक्षक म्हणून यांची ओळख आहे. या शिक्षकांनी आपापल्या शाळेत शिष्यवृत्ती धारक विद्यार्थी गुणवत्ता यादीत देखील आणले आहेत. ओखवडी गावाच्या सर्वांगीण प्रगतीसाठी आपण निश्चित योगदान देऊ अशी ग्वाही नव्याने नियुक्त झालेल्या केंद्रप्रमुख शशिकांत शेलार, योगेश शेलार, आनंदा शेलार, विक्रम पार्टे यांनी दिली. ओखवडी गावातील चार शिक्षकांची केंद्रप्रमुख पदी नियुक्ती झाल्याने मान्यवरांनी अभिनंदन केले आहे.
