HSRP नंबर प्लेट न बसविणाऱ्या वाहनांवर सातारा जिल्ह्यात कारवाई; 365 वाहनांवर दंड
सातारा : दि. 1 एप्रिल 2019 पूर्वी नोंदणी झालेल्या सर्व जुन्या वाहनांना हाय सिक्युरिटी रजिस्ट्रेशन नंबर प्लेट (HSRP) बसविणे बंधनकारक करण्यात आले आहे. HSRP नंबर प्लेट बसविण्यासाठी 30 जून 2026 पर्यंत अंतिम मुदत देण्यात आली होती. ही मुदत संपल्यानंतर 1 जुलै 2026 पासून HSRP नंबर प्लेट न बसविणाऱ्या वाहनांवर कारवाई सुरू करण्यात आली आहे.
केंद्रीय मोटार वाहन नियम 1989 मधील नियम 50 तसेच मोटार वाहन अधिनियमातील कलम 177 अन्वये ही कारवाई करण्यात येत आहे. सातारा प्रादेशिक परिवहन कार्यालयाच्या वतीने जिल्ह्यातील विविध विभागांमध्ये 1,283 वाहनांची तपासणी करण्यात आली. यामध्ये 365 वाहनांवर HSRP नंबर प्लेट नसल्याचे आढळून आल्याने कारवाई करण्यात आली असून, 13 हजार रुपयांचा दंड वसूल करण्यात आला आहे.
सर्व शासकीय वाहनांनाही HSRP नंबर प्लेट बसवून घेण्याच्या सूचना देण्यात आल्या आहेत. तसेच शासकीय अधिकारी व कर्मचाऱ्यांनी दि. 1 एप्रिल 2019 पूर्वी नोंदणी झालेल्या त्यांच्या वैयक्तिक वाहनांनाही HSRP नंबर प्लेट बसवून घ्यावी, असे आवाहन करण्यात आले आहे.
वाहनांची ओळख आणि सुरक्षितता अधिक सक्षम करण्यासाठी नागरिकांनी आपल्या जुन्या वाहनांना HSRP नंबर प्लेट बसवून घेणे आवश्यक असून, वाहनधारकांनी विलंब न करता HSRP नंबर प्लेट बसवून घ्यावी, असे आवाहन परिवहन विभागाकडून करण्यात आले.
