रहिमतपूरचे माजी नगराध्यक्ष सुनील माने यांचा जिल्हाध्यक्षपदाचा राजीनामा अजित पवार गटात प्रवेशाची तयारी
रहिमतपूर – शरद पवार गट राष्ट्रवादी काँग्रेसचे जिल्हाध्यक्ष आणि रहिमतपूरचे माजी नगराध्यक्ष सुनील माने यांनी आपल्या पदाचा राजीनामा दिल्याने तालुक्यातील राजकारणात मोठी खळबळ उडाली आहे. सुनील माने लवकरच अजित पवार यांच्या राष्ट्रवादी गटात प्रवेश करणार असल्याची माहिती समोर येत आहे.
सुनील माने यांचा राजीनामा हा रहिमतपूर नगरपरिषद तसेच कराड उत्तरच्या राजकारणातील महत्त्वाचा विकास मानला जात असून हा धक्का माजी आमदार बाळासाहेब पाटील यांना बसल्याचे राजकीय वर्तुळात म्हटले जाते. आगामी निवडणुकांच्या पार्श्वभूमीवर या घडामोडींना विशेष महत्त्व प्राप्त झाले आहे.
जिल्ह्यात राष्ट्रवादी काँग्रेसच्या दोन्ही गटांमध्ये वाढत चाललेल्या अंतर्गत घडामोडींमध्ये माने यांच्या निर्णयामुळे आणखी एक नवीन समीकरण उभे राहत असून याचा प्रभाव स्थानिक निवडणुकांवर दिसण्याची शक्यता वर्तवली जात आहे.
राजीनाम्याची औपचारिक नोंद झाल्यानंतर सुनील माने यांचा अजित पवार गटात प्रवेश कधी होणार याकडे सर्वांचे लक्ष लागले आहे.
