भीषण अपघातात पुसेगावचे दाम्पत्य जागीच ठार; मुलगा गंभीर जखमी
वर्धनगड-नेर फाट्यानजीक कार-आयशरची समोरासमोर धडक; पुसेगाववर शोककळा
पुसेगाव : सातारा–पंढरपूर मार्गावर वर्धनगड-नेर फाट्यानजीक रविवारी मध्यरात्री कार आणि आयशर वाहनाची समोरासमोर भीषण धडक झाली. या अपघातात पुसेगाव येथील दाम्पत्याचा जागीच मृत्यू झाला, तर त्यांचा मुलगा गंभीर जखमी झाला. या दुर्दैवी घटनेमुळे पुसेगाव परिसरावर शोककळा पसरली आहे.
या अपघातात विजय बबन भोसले आणि त्यांच्या पत्नी समृद्धी विजय भोसले यांचा मृत्यू झाला. विजय भोसले हे सेवागिरी शिक्षण मंडळ विद्यालयात लिपिक म्हणून कार्यरत होते. अपघातात त्यांचा मुलगा गंभीर जखमी झाला असून त्याच्यावर रुग्णालयात उपचार सुरू आहेत.
दरम्यान, अपघाताची माहिती मिळताच संबंधित यंत्रणांनी घटनास्थळी धाव घेतली. अपघात नेमका कशामुळे झाला, याबाबतचा तपास सुरू आहे. या घटनेने पुसेगावसह परिसरात हळहळ व्यक्त होत असून भोसले कुटुंबीयांवर दुःखाचा डोंगर कोसळला आहे.
