सावंत कुटुंबाचा अभिमान! स्वराज सावंत यांची भारतीय सैन्यदलात लेफ्टनंटपदी निवड
सातारा -सातारा जिल्ह्यातील डिस्कळ गावासाठी अभिमानाची बातमी समोर आली आहे. माजी तालुका मास्तर आयु. मारुती बाजी सावंत (डिस्कळ) व माजी मुख्याध्यापिका आयु. सौ. कुसुम मारुती सावंत यांचे नातू, तसेच प्राथमिक शिक्षक सहकारी बँक सातारा येथील उप मुख्य कार्यकारी अधिकारी आयु. सुदर्शन मारुती सावंत यांचे सुपुत्र आयु. स्वराज सुदर्शन सावंत यांची भारतीय सैन्यदल मध्ये क्लास वन अधिकारी म्हणून लेफ्टनंट पदावर निवड झाली आहे.
स्वराज सावंत यांनी कठोर परिश्रम, जिद्द आणि शिस्तबद्ध तयारीच्या जोरावर हे यश संपादन केले आहे. लहानपणापासूनच देशसेवेची प्रेरणा मिळाल्याने त्यांनी सैन्यदलात जाण्याचे ध्येय ठरवले होते. कुटुंबातील शैक्षणिक व सामाजिक परंपरेचा वारसा पुढे नेत त्यांनी आज सावंत कुटुंबाचे तसेच सातारा जिल्ह्याचे नाव उज्ज्वल केले आहे.
त्यांच्या या उल्लेखनीय यशाबद्दल परिसरातून त्यांच्यावर अभिनंदनाचा वर्षाव होत असून विविध स्तरांतून शुभेच्छा दिल्या जात आहेत. स्वराज सावंत यांचे यश हे युवकांसाठी प्रेरणादायी ठरणारे आहे.
देशसेवेच्या पवित्र कार्यासाठी सज्ज झालेल्या स्वराज सावंत यांना पुढील वाटचालीसाठी मनःपूर्वक शुभेच्छा!
