महाबळेश्वरचा ऐतिहासिक आठवडे बाजार छत्रपती संभाजी महाराज पार्किंगमध्ये स्थलांतरित होणार
महाबळेश्वर : शहरातील एल. सी. डिसोजा रोडवर अनेक वर्षांपासून भरणारा ऐतिहासिक आठवडे बाजार आता पालिकेच्या छत्रपती संभाजी महाराज पार्किंग परिसरात स्थलांतरित करण्यात येणार आहे. या प्रस्तावित जागेची नगराध्यक्ष सुनील शिंदे, मुख्याधिकारी योगेश पाटील तसेच स्थानिक नगरसेवकांनी प्रत्यक्ष पाहणी करून आवश्यक नियोजनाचा आढावा घेतला.
एल. सी. डिसोजा रोडवर आठवडे बाजार भरत असल्याने नेहमीच वाहतूक कोंडी होत होती. पर्यटकांसह स्थानिक नागरिकांना मोठा त्रास सहन करावा लागत होता. नवीन ठिकाणी बाजार सुरू झाल्यानंतर वाहतुकीचा ताण कमी होण्याबरोबरच बाजार अधिक नियोजनबद्ध पद्धतीने भरविणे शक्य होणार आहे.
पाहणीदरम्यान मुख्याधिकारी योगेश पाटील यांनी संपूर्ण परिसराची तातडीने स्वच्छता करण्याचे आदेश प्रशासनाला दिले. तसेच व्यापाऱ्यांसाठी शिस्तबद्ध गाळे, नागरिकांसाठी पिण्याच्या पाण्याची सुविधा आणि प्रभावी कचरा व्यवस्थापनाची व्यवस्था करण्याच्या सूचनाही देण्यात आल्या.
या पाहणी दौऱ्यात पालिका अधिकारी, नगरसेवक आणि व्यापारी प्रतिनिधी उपस्थित होते. जागेची स्वच्छता व प्राथमिक नियोजन पूर्ण झाल्यानंतर आठवडे बाजार नव्या ठिकाणी अधिकृतपणे सुरू करण्यात येणार असल्याची माहिती पालिकेकडून देण्यात आली.
