महाबळेश्वर तालुक्यातील पार मध्ये दिवसाढवळ्या घरफोडी: दोन लाखांचे सोन्याचे दागिने लंपास
महाबळेश्वर:महाबळेश्वर तालुक्यातील मौजे पार येथे दिवसाढवळ्या घरफोडी झाल्याची धक्कादायक घटना समोर आली आहे. अज्ञात चोरट्यांनी बंद घराचा कडी-कोयंडा तोडून घरातील लाखांचे सोन्याचे दागिने चोरून नेल्याची तक्रार महाबळेश्वर पोलीस ठाण्यात दाखल करण्यात आली आहे.
मिळालेल्या माहितीनुसार, ३ जुलै २०२६ रोजी सकाळी १०:०० ते दुपारी १:२० च्या दरम्यान ही घटना घडली. सुष्मा सुधाकर महामुलकर (वय ४६, रा. मौजे पार) या अंगणवाडी सेविका म्हणून काम करतात. त्या आपल्या कामासाठी घराबाहेर गेल्या असताना, अज्ञात चोरट्यांनी त्यांच्या घराचा मुख्य दरवाजा तोडून आत प्रवेश केला.
घरातील बेडरूममध्ये असलेल्या कपाटाचे लॉकर तोडून चोरट्यांनी दागिने लंपास केले. यामध्ये सोन्याचे मंगळसूत्र, कर्णफुले, वेल आणि सोन्याची अंगठी असा एकून दोन लाख रुपये किमतीचा ऐवज चोरीला गेला आहे.
पोलीस तपास सुरू
घटनेची माहिती मिळताच महाबळेश्वर पोलीस ठाण्याचे सहाय्यक पोलीस निरीक्षक महारुद्र परजणे आणि त्यांच्या पथकाने घटनास्थळी धाव घेतली. याप्रकरणी अज्ञात चोरट्यांविरुद्ध भारतीय न्याय संहिता २०२३ च्या कलम ३०५(ए) आणि ३३१(४) अन्वये गुन्हा दाखल करण्यात आला असून, पोलीस अधिक तपास करत आहेत. दिवसाढवळ्या घडलेल्या या चोरीच्या घटनेमुळे परिसरातील नागरिकांमध्ये भीतीचे वातावरण पसरले आहे.
