सातारा जिल्ह्याला मान्सूनचा दिलासा; कोयना धरण क्षेत्रासह महाबळेश्वर, साताऱ्यात हलक्या सरी
सातारा प्रतिनिधी : गेल्या काही दिवसांपासून लांबलेल्या मान्सून पावसामुळे शेतकरी आणि नागरिक चिंतेत असताना सोमवारी जिल्ह्यात अनेक भागांत पावसाने हजेरी लावून दिलासा दिला. कोयना धरण क्षेत्र, महाबळेश्वर तसेच सातारा शहर आणि परिसरात हलक्या स्वरूपाच्या पावसाच्या सरी कोसळल्या.
मान्सूनच्या प्रगतीकडे सर्वांचे लक्ष लागले असताना पडलेल्या या पावसामुळे वातावरणात गारवा निर्माण झाला आहे. विशेषतः शेतीच्या कामांसाठी पावसाची प्रतीक्षा करणाऱ्या शेतकऱ्यांना यामुळे काहीसा दिलासा मिळाला आहे.
कोयना धरणाच्या पाणलोट क्षेत्रातही पावसाची नोंद होत असून, आगामी काही दिवसांत पावसाचा जोर वाढण्याची अपेक्षा व्यक्त केली जात आहे. महाबळेश्वर परिसरात दिवसभर ढगाळ वातावरणासह रिमझिम पाऊस सुरू होता. सातारा शहरातही अधूनमधून हलक्या सरी कोसळल्याने नागरिकांना उकाड्यापासून दिलासा मिळाला.
दरम्यान, हवामानातील बदल लक्षात घेता येत्या काही दिवसांत जिल्ह्यात पावसाची तीव्रता वाढण्याची शक्यता वर्तविण्यात येत आहे.
