महाबळेश्वर नगरपरिषद हद्दीत मतदार यादी सखोल पुनरीक्षण कार्यक्रम उत्साहात; १० प्रभागांत पार पडल्या ‘वॉर्ड सभा’
महाबळेश्वर –माननीय भारत निवडणूक आयोगाच्या निर्देशानुसार महाबळेश्वर गिरीस्थान नगरपरिषद हद्दीमध्ये ‘मतदार यादी सखोल पुनरीक्षण कार्यक्रम’ (SIR) अत्यंत पारदर्शक वातावरणात राबविला जात आहे. या विशेष मोहिमेअंतर्गत नगरपरिषद क्षेत्रातील दुबार, मयत, गैरहजर आणि स्थलांतरित (ASD) मतदारांची अचूक पडताळणी करण्याची प्रक्रिया वेगाने सुरू आहे.
या संपूर्ण प्रक्रियेत अधिक पारदर्शकता आणि सुसूत्रता आणण्यासाठी सातारा जिल्ह्याचे माननीय जिल्हाधिकारी यांच्या २४ जुलै २०२६ रोजीच्या आदेशानुसार, पालिका हद्दीतील संभाव्य याद्यांचे वाचन करण्यासाठी विशेष वॉर्ड सभांचे आयोजन करण्यात आले होते.
१० प्रभागांमधील १६ भाग याद्यांचे वाचन पूर्ण
जिल्हाधिकाऱ्यांच्या सूचनेनुसार महाबळेश्वर गिरीस्थान नगरपरिषदेच्या एकूण १० प्रभागांमध्ये दिनांक २८ जुलै २०२६ आणि २९ जुलै २०२६ रोजी वॉर्ड सभांचे यशस्वी आयोजन करण्यात आले. या सभांमध्ये केंद्र स्तरीय अधिकाऱ्यांनी (BLO) तयार केलेल्या नगरपरिषद हद्दीतील एकूण १६ भाग याद्यांमधील गैरहजर, दुबार, मयत व स्थलांतरित मतदारांच्या संभाव्य याद्यांचे जाहीर वाचन केले.
सर्वपक्षीय प्रतिनिधी आणि नागरिकांची उपस्थिती
या वॉर्ड सभांच्या आयोजनात सर्वच स्तरांतून उस्फूर्त प्रतिसाद मिळाला. प्रत्येक प्रभागातील स्थानिक नगरसेवक, सर्व राजकीय पक्षांचे अधिकृत प्रतिनिधी (BLA) आणि नागरिक मोठ्या संख्येने उपस्थित होते. सर्वांच्या समक्ष याद्यांचे वाचन झाल्यामुळे मतदार यादीच्या शुद्धीकरणाला मोठी गती मिळाली आहे.
प्रशासकीय अधिकारी व लोकप्रतिनिधींचे विशेष योगदान
सदर मोहीम यशस्वीरीत्या पार पाडण्यासाठी:
▪️लोकप्रतिनिधींचे सहकार्य: नगराध्यक्ष श्री. सुनील शिंदे, उपनगराध्यक्ष श्री. नासिर मुलाणी, सर्व सन्माननीय नगरसेवक, नगरसेविका आणि सर्वपक्षीय प्रतिनिधींचे विशेष सहकार्य लाभले.
▪️प्रशासकीय कामगिरी: नगरपरिषदेचे मुख्याधिकारी श्री. योगेश पाटील यांच्या मार्गदर्शनाखाली पर्यवेक्षक श्री. ज्ञानेश्वर मोहिते, श्री. मंगेश माने, सहायक पर्यवेक्षक आणि सर्व केंद्र स्तरीय अधिकारी (BLO) यांनी अत्यंत महत्त्वाची आणि उल्लेखनीय कामगिरी बजावली.
या पुनरीक्षण कार्यक्रमामुळे महाबळेश्वर नगरपरिषद क्षेत्रातील मतदार यादी अधिक पारदर्शक, अचूक आणि त्रुटीमुक्त होण्यास मदत होणार आहे.
