महाबळेश्वरच्या विकासकामांचा मंत्री मकरंद आबा पाटील यांनी घेतला आढावा; अतिवृष्टीग्रस्त भागात तातडीच्या उपाययोजनांचे निर्देश
महाबळेश्वर : महाबळेश्वर गिरीस्थान नगरपरिषदेअंतर्गत सुरू असलेल्या विविध विकासकामांचा सविस्तर आढावा घेण्यासाठी मंत्री मकरंद आबा पाटील यांच्या अध्यक्षतेखाली महत्त्वपूर्ण बैठक पार पडली. यावेळी शहराच्या सर्वांगीण विकासासाठी सुरू असलेल्या विविध प्रकल्पांची सद्यस्थिती, कामांची प्रगती आणि पुढील नियोजनाबाबत संबंधित विभागांच्या अधिकाऱ्यांसोबत सखोल चर्चा करण्यात आली.
बैठकीत ५ व ६ जुलै रोजी झालेल्या अतिवृष्टीमुळे महाबळेश्वर शहर व परिसरात झालेल्या नुकसानीचाही आढावा घेण्यात आला. रस्ते, संरक्षक भिंती, पाणीपुरवठा व्यवस्था, सार्वजनिक सुविधा तसेच भूस्खलनग्रस्त भागातील परिस्थितीची माहिती घेऊन नागरिकांच्या सुरक्षिततेला सर्वोच्च प्राधान्य देत तातडीने आवश्यक उपाययोजना करण्याचे निर्देश मंत्री मकरंद आबा पाटील यांनी संबंधित अधिकाऱ्यांना दिले.
नागरिकांना कोणत्याही प्रकारचा त्रास होऊ नये, नुकसानग्रस्त ठिकाणांची दुरुस्ती तातडीने हाती घ्यावी तसेच भविष्यात अतिवृष्टीचा परिणाम कमी करण्यासाठी दीर्घकालीन नियोजन करण्याच्या सूचनाही प्रशासनाला देण्यात आल्या.
महाबळेश्वरच्या विकासाबरोबरच नागरिकांची सुरक्षितता, दर्जेदार नागरी सुविधा आणि सक्षम पायाभूत व्यवस्था निर्माण करण्यासाठी शासन कटिबद्ध असल्याचे यावेळी मंत्री मकरंद आबा पाटील यांनी स्पष्ट केले. सर्व विकासकामे गुणवत्तापूर्ण व निर्धारित वेळेत पूर्ण करण्यासाठी सातत्याने पाठपुरावा केला जाईल, असेही त्यांनी सांगितले.
या बैठकीस नगराध्यक्ष सुनील शिंदे, मुख्याधिकारी पाटील, उपनगराध्यक्ष, सर्व नगरसेवक तसेच विविध विभागांचे अधिकारी उपस्थित होते.
