यशोदा टेक्निकल कॅम्पसमध्ये जागतिक पर्यावरण दिनानिमित्त ‘ग्रीन गार्डियन’ वेब पोर्टलचे उद्घाटन
सातारा, दि. ५ जून २०२६ : पर्यावरण संवर्धनाची भावना अधिक दृढ करण्यासाठी आणि विद्यार्थ्यांना वृक्षसंवर्धनाच्या उपक्रमात सक्रिय सहभागी करण्याच्या उद्देशाने यशोदा टेक्निकल कॅम्पस, सातारा येथे जागतिक पर्यावरण दिनानिमित्त ‘ग्रीन गार्डियन’ वेब पोर्टलचे उद्घाटन उत्साहपूर्ण वातावरणात करण्यात आले. विद्यार्थ्यांना संस्थेमार्फत देण्यात आलेल्या रोपांच्या वाढीचा आणि संगोपनाचा नियमित आढावा घेण्यासाठी हे अभिनव वेब पोर्टल विकसित करण्यात आले आहे.
या कार्यक्रमास यशोदा शिक्षण संस्थेचे संस्थापक अध्यक्ष प्रा. डॉ. दशरथ सगरे तसेच संस्थेच्या विश्वस्त आर्किटेक्ट स्वराली सगरे यांची प्रमुख उपस्थिती लाभली. पर्यावरण संरक्षणाच्या दिशेने तंत्रज्ञानाचा प्रभावी वापर करून विद्यार्थ्यांमध्ये जबाबदारीची भावना निर्माण करण्यासाठी राबविण्यात आलेल्या या उपक्रमाचे त्यांनी विशेष कौतुक केले.
‘ग्रीन गार्डियन’ वेब पोर्टलच्या माध्यमातून विद्यार्थ्यांना देण्यात आलेल्या प्रत्येक रोपाची नोंद ठेवली जाणार असून त्याच्या वाढीचा टप्प्याटप्प्याने मागोवा घेता येणार आहे. विद्यार्थी वेळोवेळी आपल्या रोपांचे छायाचित्र अपलोड करू शकतील तसेच त्यांची वाढ, देखभाल आणि स्थितीची माहिती पोर्टलवर नोंदवू शकतील. त्यामुळे केवळ वृक्षारोपण न करता वृक्षसंवर्धनालाही प्राधान्य देण्याचा संदेश या उपक्रमातून दिला जाणार आहे.
यावेळी प्रा. डॉ. दशरथ सगरे यांनी सांगितले की, पर्यावरण संवर्धन ही काळाची गरज असून प्रत्येक विद्यार्थ्याने किमान एक वृक्ष लावून त्याचे संगोपन करण्याची जबाबदारी स्वीकारली पाहिजे. वृक्षारोपण हा केवळ एक दिवसाचा उपक्रम नसून तो सातत्याने जपण्याचा संकल्प आहे. ‘ग्रीन गार्डियन’ पोर्टल विद्यार्थ्यांना पर्यावरणाबद्दल अधिक संवेदनशील बनवेल आणि त्यांना निसर्गाशी जोडून ठेवेल, असा विश्वास त्यांनी व्यक्त केला.
आर्किटेक्ट स्वराली सगरे यांनी आपल्या मनोगतात पर्यावरणपूरक विकासाची आवश्यकता अधोरेखित करताना सांगितले की, तंत्रज्ञान आणि पर्यावरण यांचा समन्वय साधणारे असे उपक्रम भविष्यातील शाश्वत विकासासाठी अत्यंत महत्त्वाचे आहेत. विद्यार्थ्यांनी केवळ शिक्षणातच नव्हे तर सामाजिक आणि पर्यावरणीय जबाबदाऱ्या पार पाडण्यातही पुढाकार घ्यावा, असे आवाहन त्यांनी केले. कुलसचिव, सहसंचालक, प्राचार्य, विभाग प्रमुख आणि मोठ्या संख्येने उपस्थित होते.
या वेब पोर्टलचे विशेष वैशिष्ट्य म्हणजे ते यशोदा टेक्निकल कॅम्पसच्या बी.टेक. कॉम्प्युटर सायन्स अँड इंजिनिअरिंग विभागातील विद्यार्थी आशीष साबळे यांनी विकसित केले आहे. पर्यावरण संवर्धनासाठी तंत्रज्ञानाचा वापर करण्याच्या संकल्पनेतून त्यांनी हे पोर्टल तयार केले असून त्यासाठी उपस्थित मान्यवरांनी त्यांचे विशेष अभिनंदन केले. विद्यार्थ्यांच्या नवोपक्रमशीलतेला प्रोत्साहन देणारे हे उदाहरण असल्याचे मत यावेळी व्यक्त करण्यात आले.
जागतिक पर्यावरण दिनानिमित्त आयोजित या उपक्रमामुळे विद्यार्थ्यांमध्ये पर्यावरण संरक्षणाची जाणीव अधिक दृढ होणार असून प्रत्येक रोपाच्या संवर्धनासाठी जबाबदारीची भावना निर्माण होण्यास मदत होणार आहे. पर्यावरण संवर्धनासाठी तंत्रज्ञानाचा प्रभावी वापर करणारा हा उपक्रम यशोदा टेक्निकल कॅम्पसच्या सामाजिक बांधिलकीचे आणि नाविन्यपूर्ण शैक्षणिक दृष्टिकोनाचे प्रतीक ठरत आहे.
