कराड येथील कोयना वसाहतीत हिट अॅण्ड रन एक महिला ठार; तीन-चारजणी जखमी, जखमींवर उपचार सुरू
कराड प्रतिनिधी –कोयना वसाहत, ता. कराड येथील भाजी मंडईत एका भरधाव कारने भाजी विक्रेत्या महिलांना चिरडले. त्यानंतर सदरची कार कठड्यावर जाऊन अडकली. या अपघातात एका महिलेचा मृत्यू झाला असून, अन्य तीन-चार भाजी विक्रेत्या महिला जखमी झाल्या असून, त्यांच्यावर कृष्णा रुग्णालयात उपचार सुरू आहेत.
बुधवारी रात्री ७.३० वाजण्याच्या सुमारास हा अपघात झाला. उषा बाळू रौंदाळे (वय ४७) रा. मलकापूर, ता. कराड असे अपघातात मृत्यू झालेल्या महिलेचे नाव आहे.याबाबत घटनास्थळावरून मिळालेल्या माहितीनुसार, कोयना वसाहत येथे रस्त्यालगत भरत असलेल्या भाजी मंडईत बुधवारी रात्री ७.३० वाजण्याच्या सुमारास भरधाव वेगात आलेल्या कारने एका दुचाकीला धडक दिली. त्यानंतर त्या कारने भाजी विक्रीसाठी बसलेल्या महिलेला चिरडले. त्यानंतर सदरची कार रस्त्यालगत असणाऱ्या बोर्डला धडकून कठड्यावर जाऊन अडकली.
दरम्यान, जखमी झालेल्या भाजी विक्रेत्या महिलेला स्थानिकांनी तात्काळ उपचारासाठी कृष्णा रुग्णालयात हलवले. परंतु, त्यांचा उपचारापूर्वीच मृत्यू झाला होता. या अपघातात अन्य तीन चार भाजी विक्रेत्या महिलाही जखमी झाल्या असून, त्यांच्यावर कृष्णा रुग्णालय उपचार सुरू आहेत. अपघाताची नोंद रात्री उशिरापर्यंत पोलिसात दाखल झाली आहे.
