स्वातंत्र्यदिनाच्या पर्वावर उत्कर्ष पतसंस्थेतर्फे देशभक्तीपर गीतांची सुरेल मैफल –
वाई : भारतीय स्वातंत्र्यदिनाच्या गौरवशाली पर्वानिमित्त राष्ट्रप्रेमाचा जागर करणाऱ्या देशभक्तीपर गीतांची सुरेल मैफल उत्कर्ष नागरी सहकारी पतसंस्था मर्यादित, वाई यांच्या वतीने आयोजित करण्यात आली आहे. शनिवार, दि. १५ ऑगस्ट २०२६ रोजी सकाळी १० वाजता, सत्यवती जोशी सभागृह, कन्या शाळा, मधली आळी, वाई येथे हा विशेष सांगीतिक कार्यक्रम रंगणार आहे.
स्वातंत्र्यासाठी आपल्या सर्वस्वाचा त्याग करणाऱ्या क्रांतिकारक व स्वातंत्र्यसैनिकांना संगीतमय मानवंदना देण्याबरोबरच नव्या पिढीच्या मनात राष्ट्रप्रेम, राष्ट्रीय एकात्मता आणि देशाभिमानाची भावना अधिक दृढ व्हावी, या उद्देशाने या कार्यक्रमाचे आयोजन करण्यात आले आहे.
कार्यक्रमात सुप्रसिद्ध गायक सागर वैराट व त्यांच्या टीमकडून देशभक्तीपर गीतांचा बहारदार नजराणा सादर केला जाणार आहे. त्यांच्यासमवेत गायिका तेजस्विनी पोरे आणि गायिका प्रियांका कदम-भिलारे व डॉ. शस्मिता जैन करणार असून, लाईव्ह बँडच्या साथीने सादर होणाऱ्या गीतांमुळे उपस्थितांना राष्ट्रप्रेमाची अनोखी सांगीतिक अनुभूती मिळणार आहे.
आर्थिक क्षेत्रातील विश्वासार्ह सेवेसोबतच सामाजिक, शैक्षणिक, सांस्कृतिक आणि क्रीडा क्षेत्रात विविध उपक्रम राबवत समाजाशी असलेले नाते अधिक दृढ करण्याचा उत्कर्ष पतसंस्थेचा सातत्याने प्रयत्न राहिला आहे. त्याच सामाजिक बांधिलकीचा एक भाग म्हणून स्वातंत्र्यदिनानिमित्त या कार्यक्रमाचे आयोजन करण्यात आले आहे.
‘सूर देशभक्तीचे… स्वर राष्ट्रप्रेमाचे… आणि मानवंदना स्वातंत्र्यवीरांच्या त्यागाला!’ या भावनेतून रंगणाऱ्या या सांगीतिक सोहळ्यास वाई शहर व परिसरातील नागरिक, युवक-युवती आणि संगीतप्रेमींनी मोठ्या संख्येने उपस्थित राहावे, असे आवाहन उत्कर्ष नागरी सहकारी पतसंस्थेच्या वतीने करण्यात आले आहे.
