धैर्यशील कदम यांच्या प्रचारार्थ बैठकीस मंत्री मकरंद पाटील यांची प्रमुख उपस्थिती
सातारा : सांगली–सातारा विधानपरिषद मतदारसंघाच्या निवडणुकीच्या पार्श्वभूमीवर महायुतीचे अधिकृत उमेदवार धैर्यशील कदम यांच्या प्रचारार्थ आयोजित करण्यात आलेल्या महत्त्वपूर्ण बैठकीस मंत्री मकरंद पाटील यांची प्रमुख उपस्थिती लाभली. या बैठकीत निवडणुकीच्या अनुषंगाने सविस्तर चर्चा करण्यात आली तसेच प्रचाराचे नियोजन आणि आगामी रणनीतीचा आढावा घेण्यात आला.
सातारा–सांगली विधानपरिषद निवडणुकीत भाजपचे अधिकृत उमेदवार धैर्यशील कदम यांना महायुतीतील मंत्री मकरंद पाटील यांचा पाठिंबा मिळाल्याने निवडणुकीचे समीकरण अधिक बळकट झाल्याची चर्चा राजकीय वर्तुळात रंगली आहे. यामुळे भाजपासाठी आव्हानात्मक मानली जात असलेली ही निवडणूक तुलनेने सुकर होण्याची शक्यता व्यक्त केली जात आहे.
बैठकीदरम्यान उपस्थित पदाधिकारी, लोकप्रतिनिधी आणि कार्यकर्त्यांशी संवाद साधत धैर्यशील कदम यांना भरघोस मतांनी विजयी करण्याचा निर्धार व्यक्त करण्यात आला. तसेच निवडणुकीच्या पार्श्वभूमीवर मतदारांपर्यंत प्रभावीपणे पोहोचण्यासाठी विविध मुद्द्यांवर मार्गदर्शन करण्यात आले.
या बैठकीस राष्ट्रवादी काँग्रेस पक्षाचे सर्व नगराध्यक्ष, नगरसेवक, जिल्हा परिषद सदस्य, पंचायत समिती सभापती तसेच पक्षाचे प्रमुख पदाधिकारी मोठ्या संख्येने उपस्थित होते. उपस्थितांनी महायुतीचे उमेदवार धैर्यशील कदम यांच्या विजयासाठी एकजुटीने काम करण्याचा संकल्प व्यक्त केला.
