महाबळेश्वर पंचायत समितीच्या सर्वसाधारण सभेत विविध विकासकामांवर चर्चा
महाबळेश्वर (प्रतिनिधी) : पंचायत समिती महाबळेश्वरच्या मासिक सर्वसाधारण सभेचे आयोजन शुक्रवार दिनांक २७ मार्च २०२६ रोजी के. एम. आर. पिटारे सभागृहात करण्यात आले. सभेच्या अध्यक्षस्थानी पंचायत समितीच्या सभापती शंकुतला रमेश चोरमले या होत्या. यावेळी उपसभापती संजय मोरे, पंचायत समिती सदस्य, विविध विभागांचे अधिकारी व कर्मचारी मोठ्या संख्येने उपस्थित होते.
सभेची सुरुवात प्रशासनाच्या वतीने स्वागतपर भाषणाने झाली. त्यानंतर विविध विभागांनी आपल्या कामकाजाचा आढावा सादर करत विकासकामांवर सविस्तर चर्चा करण्यात आली. यामध्ये बांधकाम विभागाने चालू कामे, मंजूर अनुदान, खर्च व अपूर्ण कामांची माहिती दिली. तसेच ग्रामीण भागातील पाणीपुरवठा व जलजीवन मिशन अंतर्गत सुरू असलेल्या योजनांचा आढावा घेण्यात आला.
सभेत काही गावांमध्ये पिण्याच्या पाण्याची टंचाई असल्याची बाब मांडण्यात आली. संबंधित अधिकाऱ्यांनी तातडीने भेट देऊन समस्या सोडवावी, असे निर्देश देण्यात आले. शिक्षण विभागाने विविध शैक्षणिक योजनांची माहिती सादर करत विद्यार्थ्यांच्या गुणवत्तावाढीसाठी उपक्रम राबवण्यावर भर दिला. तसेच रिक्त पदे भरण्याबाबत लवकर निर्णय घेण्याची गरज अधोरेखित करण्यात आली.
आरोग्य विभागानेही आपल्या कामाचा आढावा सादर करत विविध आरोग्य योजनांची माहिती दिली. उत्कृष्ट कामगिरी करणाऱ्या कर्मचाऱ्यांचे अभिनंदन करण्यात आले. पशुसंवर्धन विभागानेही आपली कामगिरी मांडली असून, शेतकऱ्यांना योजनांचा अधिक लाभ मिळावा यासाठी जनजागृती करण्याचे आवाहन करण्यात आले.
सभेत विविध विभागांच्या योजनांची अंमलबजावणी वेळेत पूर्ण करण्यावर भर देण्यात आला. सर्व अधिकारी व कर्मचाऱ्यांनी लोकप्रतिनिधींशी समन्वय ठेवून जनतेची कामे प्राधान्याने पूर्ण करावीत, असे निर्देश देण्यात आले. तसेच नव्याने निवडून आलेल्या पदाधिकाऱ्यांनी जनतेच्या प्रश्नांना तत्परतेने उत्तर देऊन विकासकामांना गती द्यावी, असे आवाहन करण्यात आले.
सभेच्या शेवटी सर्व उपस्थितांचे आभार मानण्यात आले आणि महाबळेश्वर तालुक्याच्या सर्वांगीण विकासासाठी एकत्रितपणे कार्य करण्याचा निर्धार व्यक्त करण्यात आला.
