सुभाष चौक-युनियन बँक मार्ग खचला; प्रशासनाकडून तातडीने दुरुस्तीच्या कामाला सुरुवात
महाबळेश्वर:महाबळेश्वर शहरातील वर्दळीच्या सुभाष चौक ते युनियन बँक या मार्गावर अचानक रस्ता खचल्याची घटना घडली. यामुळे या मार्गावरील वाहतुकीचा प्रश्न निर्माण झाला असून नागरिकांची गैरसोय होऊ नये म्हणून प्रशासन सतर्क झाले आहे. रस्ता खचल्याची माहिती मिळताच स्थानिक लोकप्रतिनिधी आणि नगरपालिका प्रशासनाच्या वरिष्ठ अधिकाऱ्यांनी घटनास्थळी धाव घेत पाहणी केली.
तातडीने दुरुस्तीच्या सूचना
रस्ता खचल्याची माहिती मिळताच नगराध्यक्ष सुनील शिंदे, मुख्याधिकारी योगेश पाटील, बांधकाम सभापती अफझल सुतार, नगरसेवक रोहित ढेबे आणि नगरसेवक संजय जंगम यांनी तत्काळ घटनास्थळाची पाहणी केली. सुरक्षिततेचा विचार करता या मार्गाची तातडीने डागडुजी करणे आवश्यक असल्याचे ओळखून, मुख्याधिकारी योगेश पाटील यांनी संबंधित बांधकाम विभागाला तात्काळ दुरुस्तीचे काम हाती घेण्याचे आदेश दिले.
दुरुस्तीचे काम युद्धपातळीवर
प्रशासनाच्या आदेशानंतर बांधकाम विभागाने वेळ न घालवता तातडीने दुरुस्तीच्या कामाला सुरुवात केली आहे. रस्ता खचल्यामुळे खबरदारीचा उपाय म्हणून काही काळ वाहतुकीवर निर्बंध लादण्यात आले असून, दुरुस्तीचे काम युद्धपातळीवर पूर्ण करण्याचा प्रयत्न सुरू आहे, जेणेकरून नागरिकांना होणारा त्रास लवकर दूर होईल.रस्ता दुरुस्तीचे काम वेळेत पूर्ण करण्याच्या सूचना देण्यात आल्या असून, नागरिकांनी या मार्गावरून प्रवास करताना सहकार्य करावे, असे आवाहन नगरपालिकेतर्फे करण्यात आले आहे.
