बुद्धिबळाच्या पटावर पांचगणीच्या प्रेरणाची चमक; राज्यस्तरीय स्पर्धेत मानाचा किताब
पांचगणी (प्रवीण घाडगे )-ग्रामीण भागातील खेळाडूंमध्येही योग्य मार्गदर्शन आणि अपार मेहनतीच्या बळावर राज्य स्तरावर चमकण्याची प्रचंड क्षमता असते, हेच महाबळेश्वर तालुक्यातील पांचगणीच्या कन्या प्रेरणा मनोज महाडिक हिने पुन्हा एकदा सिद्ध करून दाखवले आहे. खंडाळा येथे विश्वगंगा प्रतिष्ठान, सातारा यांच्या वतीने आयोजित करण्यात आलेल्या प्रतिष्ठेच्या ‘मकरंद आबा पाटील चषक’ राज्यस्तरीय बुद्धिबळ स्पर्धेत मीनलबेन महेता कॉलेजची विद्यार्थिनी कु. प्रेरणा महाडिक हिने दैदीप्यमान कामगिरी करत यश संपादन केले आहे. पहिल्यांदाच राज्यस्तरीय स्पर्धेत उतरलेल्या प्रेरणाने थेट विजेतेपदाला गवसणी घालत पांचगणीसह संपूर्ण महाबळेश्वर तालुक्याच्या शिरपेचात मानाचा तुरा रोवला आहे.
एकूण ९ अत्यंत चुरशीच्या फेऱ्यांमध्ये पार पडलेल्या या स्पर्धेत राज्यभरातून शेकडो नामांकित आणि अनुभवी बुद्धिबळपटूंनी सहभाग घेतला होता. प्रत्येक फेरीत खेळाडूंच्या डावपेचांची, बुद्धिकौशल्याची आणि मानसिक एकाग्रतेची मोठी कसोटी लागली. या खडतर आणि आव्हानात्मक स्पर्धेत प्रेरणाने पहिल्या फेरीतच आपल्या आक्रमक व संयमी खेळाची चुणूक दाखवली. दिग्गज खेळाडूंचे आव्हान लीलया परतवून लावत तिने १७ वर्षांखालील गटात महाबळेश्वर तालुक्यासाठी तृतीय क्रमांक तर एकंदरीत महिला गटात सर्वोत्कृष्ट कामगिरी करत राज्यस्तरीय विजेतेपद पटकावले.
तिच्या या उल्लेखनीय आणि प्रेरणादायी यशाबद्दल अपर्णा शिंदे यांच्या शुभहस्ते प्रेरणाला विजेती ट्रॉफी देऊन सन्मानित करण्यात आले. तसेच पांचगणीचे वाहतूक नियंत्रक जितेंद्र शिर्के यांनीही प्रेरणाचा विशेष सत्कार करून तिला पुढील क्रीडा प्रवासासाठी शुभेच्छा दिल्या. पहिल्याच प्रयत्नात राज्य स्तरावर मिळवलेल्या या अभूतपूर्व यशामुळे महाबळेश्वर-पांचगणी परिसरातील नागरिकांनी, क्रीडाप्रेमींनी तसेच विविध क्षेत्रांतील मान्यवरांनी तिच्यावर अभिनंदनाचा वर्षाव केला आहे. तिच्या या यशामुळे परिसरातील इतर तरुण खेळाडूंनाही मोठी ऊर्जा आणि प्रेरणा मिळणार आहे.
