भारत कौशल्य स्पर्धेसाठी नोंदणी करण्याचे आवाहन
सातारा :- राष्ट्रीय कौशल्य विकास परिषदेच्या माध्यमातून भारत कौशल्य स्पर्धा २०२६-२७ या देशातील सर्वात प्रतिष्ठित कौशल्य स्पर्धेसाठी नोंदणी सुरू करण्यात आली आहे. ही स्पर्धा दर दोन वर्षांनी आयोजित केली जात असून, विविध व्यावसायिक व तांत्रिक तसेच इतर कौशल्यांमध्ये २३ वर्षांखालील युवक-युवतींना आपल्या कौशल्याचे प्रदर्शन करण्याची सुवर्णसंधी उपलब्ध करून दिली जाते.
जिल्हास्तर, विभागस्तर आणि राज्यस्तरावरील निवड प्रक्रियेत उत्कृष्ट कामगिरी करणाऱ्या स्पर्धकांना राष्ट्रीय स्तरावरील भारत कौशल्य २०२६-२७ मध्ये सहभागी होण्याची संधी मिळणार असून, त्यानंतर जागतिक स्तरावरील जागतिक कौशल्य स्पर्धेमध्ये भारताचे प्रतिनिधित्व करण्याची संधी प्राप्त होणार आहे.
जिल्ह्यातील इच्छुक युवक-युवतींनी या स्पर्धेत मोठ्या संख्येने सहभागी होऊन आपल्या कौशल्याला राष्ट्रीय व आंतरराष्ट्रीय स्तरावर झळाळी देण्याच्या सुवर्णसंधीचा लाभ घ्यावा, असे आवाहन सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्रामार्फत करण्यात आले आहे. अधिक माहितीसाठी https://www.skillindiadigital.gov.in/home या वेबसाईटवर भेट द्या अथवा जिल्हा कौशल्य विकास, रोजगार व उद्योजकता मार्गदर्शन केंद्र, तळमजला, नवीन प्रशासकीय इमारत, ०२१६२ २३९९३८ येथे संपर्क साधावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त अमिता पवार यांनी केले.
