एकेज कॉमर्स अकॅडमीचा घवघवीत यशाचा झेंडा; सीए फायनलमध्ये चार विद्यार्थी चार्टर्ड अकाउंटंट
सातारा प्रतिनिधी : नुकत्याच जाहीर झालेल्या सीए फायनल परीक्षेच्या निकालात साताऱ्यातील एकेज कॉमर्स अकॅडमीने पुन्हा एकदा आपल्या गुणवत्तेची छाप उमटवली आहे. अकॅडमीमधील लौकिक शिंदे, प्रज्ञा जाधव, अनुष्का वाकुर्डे आणि श्रेया शर्मा यांनी अथक परिश्रम, जिद्द आणि चिकाटीच्या बळावर चार्टर्ड अकाउंटंट (CA) होण्याचे स्वप्न साकार केले आहे.
या यशामुळे विद्यार्थ्यांबरोबरच पालक, शिक्षक आणि संपूर्ण सातारा जिल्ह्यात आनंदाचे वातावरण निर्माण झाले आहे. कॉमर्स क्षेत्रात करिअर घडवू इच्छिणाऱ्या विद्यार्थ्यांसाठी एकेज कॉमर्स अकॅडमी आज सातारा जिल्ह्यात एक विश्वासार्ह दीपस्तंभ ठरत आहे.
या अगोदर लागलेल्या सीए फाउंडेशन च्या परीक्षेत ही अकॅडमीचा विद्यार्थी अभिषेक जाधव याने सीए फाउंडेशन परीक्षेत देशात १२ वा क्रमांक, तर वेदांत जगदाळे याने देशात १९ वा क्रमांक पटकावत उल्लेखनीय कामगिरी केली.
सीए आनंद कासट आणि त्यांच्या अनुभवी टीमच्या मार्गदर्शनाखाली ग्रामीण भागातील अनेक विद्यार्थी सीएसारख्या आव्हानात्मक क्षेत्रात यशस्वी कारकीर्द घडवत आहेत. विद्यार्थ्यांच्या सर्वांगीण विकासावर भर देत अकॅडमीने गेल्या पंधरा वर्षांहून अधिक काळ सातत्याने गुणवंत विद्यार्थी घडविण्याचे कार्य केले आहे.
अकॅडमीने आजवर हजाराहून अधिक विद्यार्थ्यांना यशाचा मार्ग दाखवला असून, अनेक विद्यार्थी विविध क्षेत्रांत उल्लेखनीय कामगिरी करत आहेत. सीए फायनलमधील या चार विद्यार्थ्यांच्या यशामुळे एकेज कॉमर्स अकॅडमीच्या शिरपेचात आणखी एक मानाचा तुरा खोवला गेला आहे.या यशस्वी विद्यार्थ्यांचे सर्व स्तरांतून अभिनंदन होत असून, त्यांच्या पुढील वाटचालीसाठी शुभेच्छांचा वर्षाव होत आहे.
