महाबळेश्वर तालुक्यात ‘गणपती बाप्पा मोरया’चा जयघोष; भक्तिमय वातावरणात बाप्पांचे आगमन
महाबळेश्वर :संपूर्ण महाराष्ट्रात गणेशोत्सवाचा उत्साह शिगेला पोहोचला असून, निसर्गाच्या कुशीत विसावलेल्या महाबळेश्वर तालुक्यातही मंगळवारी अत्यंत भक्तीमय आणि मंगलमय वातावरणात लाडक्या गणरायाचे आगमन झाले. पावसाची रिमझिम आणि निसर्गाची हिरवीगार चादर अशा आल्हाददायक वातावरणात भाविकांनी आपापल्या घरगुती गणेशमूर्तींचे ढोल-ताशांच्या गजात आणि पारंपारिक पद्धतीने स्वागत केले.
पाचगणी आणि महाबळेश्वर शहरासह ग्रामीण भागातही गणेशोत्सवाचा अभूतपूर्व उत्साह पाहायला मिळाला. सकाळी शहरातील मूर्ती शाळामधून आपापल्या लाडक्या बाप्पाची मूर्ती घरी नेण्यासाठी भाविकांनी एकच गर्दी केली होती. यंदा बाजारात मातीच्या आणि पर्यावरणपूरक मूर्तींना विशेष मागणी असल्याचे दिसून आले. आकर्षक रंगकाम आणि विविध रूपांमधील गणेशमूर्ती लक्ष वेधून घेत होत्या.
भरपावसातही लहान थोर सर्वांचा उत्साह दांडगा होता. हातात टाळ-मृदंग, डोक्यावर भगवी टोपी आणि मुखात ‘गणपती बाप्पा मोरया, मंगलमूर्ती मोरया’ असा जयघोष करत निघालेल्या मिरवणुका लक्ष वेधून घेत होत्या. अनेकांनी पारंपारिक वेशभूषा केली होती. महिला आणि मुलांचा सहभाग लक्षणीय होता.
अनेक ठिकाणी मंडळांनी सामाजिक संदेश देणारे देखावे उभे केले आहेत. यंदाच्या गणेशोत्सवातून सामाजिक एकोपा आणि पर्यावरण रक्षणाचा संदेश दिला जात आहे. पुढील दहा दिवस महाबळेश्वर तालुक्यात चैतन्यपूर्ण आणि उत्सवी वातावरण असणार आहे. अनुचित प्रकार टाळण्यासाठी पोलीस प्रशासनाने चोख बंदोबस्त ठेवला आहे. बाप्पाच्या आगमनाने महाबळेश्वरवासीयांमध्ये आनंदाचे उधाण आले आहे.
