घाडगे-पाटील अॅग्रो फूड्स प्रकरण; फसवणूक झालेल्या शेतकऱ्यांना तळबीड पोलिसांचे आवाहन
कराड प्रतिनिधी : तळबीड पोलीस ठाण्याच्या हद्दीतील तसेच इतर परिसरातील ज्या शेतकऱ्यांनी घाडगे-पाटील (निलेश सदाशिव घाडगे) अॅग्रो फूड्स अँड श्रीशा मसाले, प्लॉट क्र. डी-२४, एमआयडीसी तासवडे, ता. कराड, जि. सातारा या कंपनीकडे सोयाबीन विक्री करूनही अद्याप पैसे मिळाले नाहीत, अशा सर्व शेतकऱ्यांनी तातडीने तळबीड पोलीस ठाण्याशी संपर्क साधावा, असे आवाहन पोलिसांनी केले आहे.
या प्रकरणी सोयाबीन विक्रीचे पैसे न दिल्याबाबत फसवणुकीचा गुन्हा तळबीड पोलीस ठाण्यात दाखल असून त्याचा तपास सुरू आहे. त्यामुळे ज्या शेतकऱ्यांचीही अशाच प्रकारे फसवणूक झाली असेल, त्यांनी आपल्याकडील सोयाबीन विक्रीची बिले, पावत्या, वाहतूक पावत्या, बँक खात्याचा तपशील तसेच इतर संबंधित कागदपत्रांसह तात्काळ तळबीड पोलीस ठाण्यात हजर राहून माहिती द्यावी, असे आवाहन करण्यात आले आहे.
संपर्क : 📍 तळबीड पोलीस ठाणे, ता. कराड, जि. सातारा
☎️ दूरध्वनी : (02164) 258333
