श्रीक्षेत्र पुसेगाव देवस्थानाच्या विकासासाठी ₹५ कोटींच्या निधीस मंजुरी; पुढील टप्प्यात आणखी ₹१० कोटी मिळणार
पुसेगाव (ता. खटाव) : श्रीक्षेत्र पुसेगाव येथील परमपूज्य सद्गुरू श्री सेवागिरी महाराज देवस्थानाच्या विकासासाठी मोठा निर्णय घेण्यात आला आहे. पुण्यश्लोक अहिल्यादेवी होळकर ग्रामीण यात्रास्थळ ‘ब’ वर्ग योजनेअंतर्गत देवस्थानातील विविध विकासकामांसाठी ₹५ कोटींच्या निधीस प्रशासकीय मान्यता देण्यात आल्याची माहिती मंत्री जयकुमार गोरे यांनी दिली.
मंत्री गोरे यांनी सांगितले की, देवस्थानाच्या सर्वांगीण विकासासाठी हा निधी महत्त्वाचा ठरणार असून यात्रेकरूंना अधिक दर्जेदार व आधुनिक सुविधा उपलब्ध करून देण्यासाठी विविध विकासकामे हाती घेतली जाणार आहेत.
याशिवाय, देवस्थानाच्या विकासासाठी पुढील दोन टप्प्यांत आणखी ₹१० कोटींचा निधी उपलब्ध करून दिला जाणार असल्याचेही त्यांनी स्पष्ट केले. या निधीमुळे श्रीक्षेत्र पुसेगाव देवस्थानाच्या विकासाला नवी गती मिळेल, तसेच धार्मिक पर्यटनाला चालना मिळून परिसराच्या सामाजिक व आर्थिक प्रगतीलाही मोठे बळ मिळेल, असा विश्वास त्यांनी व्यक्त केला.
