सांगली–सातारा स्थानिक प्राधिकारी मतदारसंघ : भाजप विरुद्ध राष्ट्रवादी (शरद पवार) थेट सामना
महाराष्ट्र विधान परिषद निवडणूक २०२६ अंतर्गत सांगली तथा सातारा स्थानिक प्राधिकारी मतदारसंघाच्या निवडणुकीत उमेदवारी अर्ज माघारी घेण्याच्या अंतिम टप्प्यानंतर चित्र स्पष्ट झाले आहे. तानाजी भगवान पाटील, प्रताप धोंडीराम पाटील, मयुर बाबासो पाटील आणि संजय नायकू मेंढे यांनी आपले अर्ज मागे घेतल्याने आता निवडणुकीच्या रिंगणात तीन उमेदवार उरले आहेत.
रिंगणातील उमेदवार
धैर्यशील ज्ञानदेव कदम — भारतीय जनता पक्ष
अभयसिंह खाशेराव जगताप — नॅशनलिस्ट काँग्रेस पार्टी (शरदचंद्र पवार)
किशोर हनमंत धुमाळ — अपक्ष
राजकीयदृष्ट्या पाहता या निवडणुकीत मुख्य लढत भाजपचे उमेदवार धैर्यशील कदम आणि राष्ट्रवादी काँग्रेस (शरदचंद्र पवार) पक्षाचे उमेदवार अभयसिंह जगताप यांच्यातच होणार असल्याचे चित्र आहे. स्थानिक स्वराज्य संस्थांमधील मतदारांच्या संख्याबळामुळे ही निवडणूक भाजपसाठी प्रतिष्ठेची मानली जात आहे.
दुसरीकडे, पश्चिम महाराष्ट्रातील राजकारणात प्रभाव असलेल्या शरद पवार गटासाठीही ही निवडणूक महत्त्वाची ठरणार आहे. त्यामुळे अभयसिंह जगताप स्थानिक समीकरणे आपल्या बाजूने वळवून विजयाचा चमत्कार घडवतात का, याकडे सातारा आणि सांगलीसह संपूर्ण पश्चिम महाराष्ट्राचे लक्ष लागले आहे.
