महाबळेश्वर आगाराला मिळाली ‘राजमाता जिजाऊ’ बसेसची नवी भेट; ७८ व्या वर्धापन दिनी १० अत्याधुनिक बसेसचे लोकार्पण
महाबळेश्वर:महाराष्ट्र राज्य परिवहन महामंडळाच्या ७८ व्या वर्धापन दिनाचे औचित्य साधून महाबळेश्वर आगारात १० नवीन ‘राजमाता जिजाऊ’ अत्याधुनिक बसेस दिमाखात दाखल झाल्या आहेत. या नव्या बसेसमुळे महाबळेश्वरच्या पर्यटन विकासाला आणि प्रवाशांच्या सुखकर प्रवासाला मोठी गती मिळणार आहे.
उपमुख्यमंत्री शिंदे यांच्या प्रयत्नांना यश
महाबळेश्वर हे जागतिक दर्जाचे पर्यटन स्थळ असल्याने येथे पर्यटकांची मोठी वर्दळ असते. मात्र, गेल्या काही काळापासून जुन्या बसेस आणि अपुऱ्या गाड्यांमुळे प्रवासी, स्थानिक नागरिक व पर्यटकांना मोठ्या गैरसोयीला सामोरे जावे लागत होते. ही समस्या लक्षात घेऊन महाबळेश्वरचे सुपुत्र व राज्याचे उपमुख्यमंत्री एकनाथ शिंदे यांनी विशेष पुढाकार घेतला. त्यांच्या प्रयत्नातून महाबळेश्वर आगाराला १० नवीन व सुसज्ज बसेस मंजूर झाल्या, ज्या आता प्रत्यक्ष सेवेत दाखल झाल्या आहेत.
वर्धापन दिनाचा दुहेरी आनंद
एसटी महामंडळाच्या ७८ व्या वर्धापन दिनानिमित्त आयोजित कार्यक्रमात या नवीन बसेसचे पूजन करण्यात आले. याप्रसंगी ज्येष्ठ प्रवाशांच्या हस्ते केक कापून एसटीचा वर्धापन दिन उत्साहात साजरा करण्यात आला. नवीन बसेसच्या आगमनामुळे आगार कर्मचारी आणि प्रवाशांमध्ये आनंदाचे वातावरण पसरले आहे.
आधुनिक सुविधांनी युक्त प्रवास
या नवीन बसेस अत्याधुनिक सोयी-सुविधांनी सज्ज असून, महाबळेश्वरच्या डोंगराळ आणि नागमोडी घाटातून प्रवास करताना प्रवाशांना अधिक सुरक्षित आणि आरामदायी अनुभव मिळणार आहे. पर्यटनाच्या हंगामात बसेसची कमतरता भासू नये, यासाठी या १० बसेसची भर मोलाची ठरणार आहे.
या लोकार्पण सोहळ्यास जिल्हा बँकेचे राजू शेठ राजपुरे, जिल्हा परिषद सदस्य अजित संकपाळ, पंचायत समिती सभापती शकुंतला चोरमले, उपसभापती संजय मोरे, आगार व्यवस्थापक महेश जाधव यांच्यासह बसेस पुजन कार्यक्रमास सहायक वाहतूक निरीक्षक किरण धुमाळ, वरीष्ठ लिपिक विकास कांबळे, अजित जमदाडे, वाहतुक नियंत्रक विठ्ठल चव्हाण, संजय निकम, राहुल कुंभार, जयवंत जाधव, प्रशांत मिसाळ, संतोष ढेबे, अक्षय फडतरे, तालुका प्रमुख गणेश उतेकर, महाबळेश्वर शिवसेना प्रमुख विजय नायडू, प्रवीण भिलारे, संभाजी जाधव, जे. के. अंबराळे, सचिन गुजर, चंद्रकांत संकपाळ, राजू पंडित, गौरव राक्षे, उस्मान खांरखंडे, प्रकाश पाटील, सचिन कदम, राहुल साळुंखे, किरण मोरे, राजेंद्र पवार, वर्षा आरडे, मेघा चोरगे, सतीश ओंबळे, सुनील ढेबे, मंगल फळणे, सोनाली बांदल व सुनीता फळणे यांच्यासह प्रवासी आणि नागरिक मोठ्या संख्येने उपस्थित होते.
नव्या बसेसच्या समावेशामुळे महाबळेश्वर आगाराची सेवा अधिक सक्षम झाली असून, पर्यटकांच्या प्रवासाचा दर्जा उंचावणार आहे.
