महाबळेश्वरमध्ये डॉ. बाबासाहेब आंबेडकर जयंतीचा उत्साह; ‘जय भीम’च्या जयघोषाने पर्यटननगरी दुमदुमली
महाबळेश्वर: भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांची १३५ वी जयंती आज महाबळेश्वरमध्ये मोठ्या उत्साहात आणि भक्तीमय वातावरणात साजरी करण्यात आली. पर्यटननगरी म्हणून ओळखल्या जाणाऱ्या महाबळेश्वरमध्ये मध्यरात्रीपासूनच भीम अनुयायांचा उत्साह ओसांडून वाहत होता. शहरातील मुख्य डॉ. बाबासाहेब आंबेडकर चौकात विविध कार्यक्रमांचे आयोजन करून महापुरुषाला विनम्र अभिवादन करण्यात आले.
आज पहाटेपासूनच महाबळेश्वर शहरात एक वेगळेच चैतन्य पाहायला मिळाले. निळ्या रंगाचे ध्वज आणि ‘जय भीम’च्या घोषणांनी परिसर सुशोभित झाला होता. स्थानिक नागरिकांसह पर्यटकांनीही डॉ. बाबासाहेब आंबेडकर चौकातील पुतळा परिसरात मोठी गर्दी केली होती.
सकाळी महाबळेश्वर नगर परिषदेच्या वतीने डॉ. बाबासाहेब आंबेडकर यांच्या पुतळ्यास पुष्पहार अर्पण करून अधिकृतपणे अभिवादन करण्यात आले. याप्रसंगी महाबळेश्वरचे नगराध्यक्ष श्री. सुनील शिंदे, मुख्याधिकारी श्री. योगेश पाटील, उपनगराध्यक्ष नासिर भाई मुलानी आणि विरोधी पक्षनेते श्री. कुमार भाऊ शिंदे उपस्थित होते. याशिवाय नगर परिषदेचे सर्व नगरसेवक, विविध संस्थांचे पदाधिकारी आणि मान्यवर उपस्थित होते.
महाबळेश्वर हे थंड हवेचे ठिकाण असल्याने सध्या येथे पर्यटकांची मोठी वर्दळ आहे. विशेष म्हणजे, स्थानिक अनुयायांसोबतच पर्यटनासाठी आलेल्या पर्यटकांनीही या सोहळ्यात सहभाग घेतला. बाबासाहेबांच्या पुतळ्याला वंदन करून अनेकांनी या ऐतिहासिक क्षणाचे साक्षीदार होण्याचा आनंद घेतला.
जयंतीनिमित्त आयोजित रॅली आणि अभिवादन सभेवेळी “डॉक्टर बाबासाहेब आंबेडकरांचा विजय असो” आणि “जय भीम” अशा घोषणांनी संपूर्ण महाबळेश्वर परिसर दुमदुमून निघाला होता. सर्वत्र अतिशय उत्साही पण शिस्तबद्ध वातावरणात हा सोहळा पार पडला.
