साताऱ्यात ‘धाडसाने भाषण करायला शिका’ कार्यशाळा उत्साहात संपन्न!
ग्लोबल व्यासपीठाचा पुढाकार; सातारा जिल्ह्यातील विविध क्षेत्रांतील मान्यवरांचा सहभाग
सातारा : सार्वजनिक व्यासपीठावर आत्मविश्वासाने बोलता यावे, आपले विचार प्रभावीपणे मांडता यावेत आणि समाजाचे नेतृत्व करण्यासाठी वक्तृत्वकलेचा विकास व्हावा, या उद्देशाने श्री सूर्यकांत पानस्कर यांच्या ग्लोबल व्यासपीठाच्या वतीने सातारा येथे आयोजित करण्यात आलेली ‘धाडसाने भाषण करायला शिका’ ही तीन दिवसीय कार्यशाळा उत्साहात संपन्न झाली. या कार्यशाळेत सातारा जिल्ह्यातील विविध क्षेत्रांतील मान्यवरांनी उत्स्फूर्त सहभाग नोंदवला.
एकेकाळी प्रभावी वक्ता हा दहा हजारांत एक, तर उत्तम सूत्रसंचालक हा पन्नास हजारांत एक, असे मानले जात होते. मात्र, आजच्या काळात प्रत्येक क्षेत्रात प्रभावीपणे संवाद साधण्याची आणि व्यासपीठावर आत्मविश्वासाने बोलण्याची गरज निर्माण झाली आहे. कौटुंबिक कार्यक्रम, सामाजिक उपक्रम, शाळा, ग्रामसभा, व्यावसायिक बैठका, राजकीय व्यासपीठ, वाढदिवस, श्रद्धांजली सभा तसेच मार्केटिंग अशा विविध ठिकाणी प्रत्येकाला आपले विचार मांडण्याची संधी मिळत असते. मात्र, पुरेसा सराव नसणे किंवा आत्मविश्वासाचा अभाव यामुळे अनेक जण समोर येऊन बोलण्यास संकोच करतात. हाच संकोच दूर करून प्रत्येकामध्ये वक्तृत्वकलेची क्षमता विकसित करण्याचे काम ग्लोबल व्यासपीठ करत आहे.
ग्लोबल व्यासपीठाचे संस्थापक सूर्यकांत पानस्कर सर यांनी कराड येथे या उपक्रमाची सुरुवात केली. त्यानंतर सांगली, कोल्हापूर आणि सातारा येथे वक्तृत्व प्रशिक्षण शिबिरांचे आयोजन करून अनेकांना व्यासपीठावर बोलण्याची प्रेरणा दिली आहे. याच उपक्रमांतर्गत साताऱ्यात तीन दिवसीय कार्यशाळा पार पडली.
शब्द, आवाज आणि देहबोलीवर विशेष मार्गदर्शन
भाषणकलेमध्ये शब्द, आवाज आणि बॉडी लँग्वेज अर्थात देहबोली यांना अनन्यसाधारण महत्त्व आहे. या तीन गोष्टींचा योग्य समन्वय साधल्यास भाषण अधिक प्रभावी होते. कार्यशाळेदरम्यान व्यासपीठावर उभे कसे राहावे, माईक कसा हाताळावा, हातवारे कसे करावेत, आवाजातील चढ-उतार कसे असावेत, शब्दांची फेक कशी करावी आणि श्रोत्यांशी संवाद कसा साधावा, याबाबत प्रशिक्षणार्थींना मार्गदर्शन करण्यात आले.
केवळ मार्गदर्शनावर भर न देता सहभागी प्रशिक्षणार्थींना प्रत्यक्ष व्यासपीठावर उभे राहून मान्यवरांसमोर बोलण्याची संधी देण्यात आली. त्यामुळे त्यांच्यातील संकोच दूर होण्यास आणि आत्मविश्वास वाढण्यास मदत झाली. तीन दिवसांच्या या प्रशिक्षणातून सहभागी व्यक्तींना वक्तृत्वकलेचे महत्त्व समजले, तसेच दैनंदिन जीवनात प्रभावी संवाद साधण्यासाठी आवश्यक कौशल्ये आत्मसात करण्याची संधी मिळाली.
विविध क्षेत्रांतील मान्यवरांचा सहभाग
या कार्यशाळेत सातारा जिल्ह्यातील विविध क्षेत्रांमध्ये कार्यरत असलेल्या अमर पवार, एकनाथ जाधव, हेमंत ठोंबरे, किरण शिंदे, विकास धायगुडे, गणेश थोमर, भास्कर आप्पा, सुनील जाधव सर, स्वप्नील भोसले, मंगेश आवळे आणि उमेश भिसे यांच्यासह विविध मान्यवरांनी सहभाग घेतला. कार्यशाळेच्या माध्यमातून सहभागी मान्यवरांना वक्तृत्वकलेचे तंत्र शिकण्याबरोबरच व्यासपीठावर आत्मविश्वासाने आपले विचार मांडण्याचा प्रत्यक्ष अनुभव मिळाला.
कार्यशाळेच्या समारोपप्रसंगी सहभागी प्रशिक्षणार्थींना स्मरणपत्रांचे वितरण करण्यात आले. यावेळी प्रमुख मान्यवर म्हणून उद्योजक रोहित शिंदे आणि कॉन्ट्रॅक्टर विक्रम पोळ उपस्थित होते. कार्यक्रमाचे सूत्रसंचालन अश्विनी कणसे यांनी केले.
सार्वजनिक जीवनात आत्मविश्वासाने आपले विचार मांडण्यासाठी वक्तृत्वकला महत्त्वाची असून, ग्लोबल व्यासपीठाच्या अशा प्रशिक्षण उपक्रमांमुळे नव्या वक्त्यांना स्वतःमधील क्षमता ओळखून ती विकसित करण्याची संधी उपलब्ध होत आहे.
