धोम तीर्थक्षेत्राच्या विकासासाठी पालकमंत्री शंभूराज देसाई यांच्याकडून पाच लाखांचा निधी मंजूर – विकास शिंदे
वाई प्रतिनिधी-पांडवकालीन इतिहास लाभलेले आणि तीर्थक्षेत्र म्हणून ओळखले जाणारे धोम हे गाव सध्या पर्यटनाच्या दृष्टीने दुर्लक्षित आहे. येथे दगडी कोरीव काम असलेली मंदिरे, नक्षीकाम केलेले घाट आणि पवित्र गायमुखाचे तिर्थस्थान असून या ठिकाणी धोम्य ऋषींचे वास्तव्य होते. अशा ऐतिहासिक व पौराणिक महत्त्वाच्या ठिकाणी विकासाची गरज असून ग्रामस्थांनी यासाठी पुढाकार घेतला आहे.
गेल्या सप्ताहात सर्वपित्री अमावस्येनिमित्त धोम घाटावर ४०० ते ५०० भाविकांनी उपस्थिती लावली होती. यात्रेचे स्वरूप आलेल्या या घाटावर भाविकांनी श्रद्धेने स्नान केले. मात्र, कृष्णा नदी पात्रात मोठ्या प्रमाणावर जलपर्णी साचल्यामुळे अस्वच्छता निर्माण झाली आहे. यापूर्वीही तत्कालीन सरपंच अविनाश नायकवडी यांच्या प्रयत्नातून काही प्रमाणात स्वच्छता झाली होती, परंतु पावसामुळे जलपर्णीचा त्रास पुन्हा वाढलेला आहे.
या पार्श्वभूमीवर शिवसेनेचे शाखाप्रमुख व जेष्ठ नागरिक संघ धोम यांनी शिवसेनेचे वाई विधानसभा प्रमुख विकास अण्णा शिंदे यांची भेट घेऊन समस्यांकडे लक्ष वेधले. शिंदे यांनी तातडीने पालकमंत्री नामदार शंभूराज देसाई यांच्याशी संपर्क साधून निधीची मागणी केली. त्यांच्या पाठपुराव्यामुळे पालकमंत्री देसाई यांच्या फंडातून पाच लाख रुपयांचा निधी मंजूर करण्यात आला आहे. हा निधी लवकरात लवकर वापरून काम सुरू करण्याचा निर्धार शिंदे यांनी व्यक्त केला असून यासाठी त्यांनी अधिकृत पत्र देऊन आराखडाही तयार करण्याचे निर्देश दिले आहेत.
या माध्यमातून पौराणिक आणि ऐतिहासिक मंदिरे, घाट, गायमुख यांसारख्या धार्मिक स्थळांचा विकास होणार आहे. यामुळे नव्या पिढीला या संस्कृतीचे दर्शन घडेल आणि पर्यटनालाही चालना मिळेल.
या आशा अनेक उपक्रमाच्या माध्यमातून पश्चिम भागात शिवसेनेत नवचैतन्य निर्माण झाले असून येणाऱ्या पंचायत समिती व जिल्हा परिषद निवडणुकीत पक्षाला चांगले यश मिळेल, असा विश्वास विकास शिंदे यांनी व्यक्त केला. तसेच, शिवसेना अधिक सक्षम करण्यासाठी वाढीकडे विशेष लक्ष देण्यात येणार असल्याचेही त्यांनी सांगितले व भविष्यात पक्ष जो आदेश देईल त्या पध्दतीने शिवसेना काम करणार असल्याचे हि सांगितले.
