बिहार निवडणुकीत महिलांच्या पाठिंब्याचा निर्णायक प्रभाव — 10,000 रुपयांच्या आर्थिक लाभाने बदलले राजकीय गणित
बिहार विधानसभा निवडणुकीत महिलांच्या मतांचा कौल निर्णायक ठरला असून, 10,000 रुपयांच्या थेट आर्थिक लाभामुळे हा कल अधिक मजबूत झाला, असे निकालांवरून स्पष्टपणे दिसून येते. महिलांमध्ये निर्माण झालेला विश्वास आणि सरकारने दिलेल्या थेट रोख मदतीचा प्रभाव मतदानावर मोठ्या प्रमाणात उमटला.
निवडणुकीची वेळ व निधी वाटप :
बिहार विधानसभा निवडणुकीची घोषणा 10 ऑक्टोबर 2025 रोजी झाली. त्यानंतर दोन टप्प्यांत — 6 नोव्हेंबर आणि 11 नोव्हेंबर — मतदान पार पडले. आज 14 नोव्हेंबर रोजी जाहीर झालेल्या निकालात, महिलांच्या प्रचंड समर्थनामुळे एनडीएला सत्ता राखण्यात मोठी मदत झाल्याचे चित्र स्पष्ट झाले.
योजनेच्या अंमलबजावणीला सुरुवात निवडणुकीच्या अवघ्या दोन-अडीच महिन्यांपूर्वी झाली होती. मात्र, निवडणुकीच्या तोंडावर 75 लाख महिलांच्या खात्यात 10,000 रुपयांची रोख मदत जमा करण्यात आली, ज्यामुळे हा निर्णय निवडणुकीतील सर्वात महत्वाचा आणि निर्णायक ठरला.
महाराष्ट्रात ‘लाडकी बहीण’ योजनेतील 1500 रुपयांच्या थेट लाभाने संपूर्ण राजकीय समीकरण बदलले होते, त्याच धर्तीवर बिहारमध्ये 10 हजारांच्या लाभाने महिला मतदारांची दिशा ठरवून टाकली.
या थेट लाभ योजनांनी महिलांचा राजकीय सहभाग वाढवून निवडणुकीचे परिणाम कसे मोठ्या प्रमाणात बदलू शकतात, याचा हा आणखी एक ठळक पुरावा मानला जात आहे.
