जयसिंगराव मल्हारी करपे हायस्कूलला विशाल शिंदेंची २५००० रुपयांची देणगी
वर्ये : येथील रयत शिक्षण संस्थेच्या जयसिंगराव म्ह्ल्हारी करपे हायस्कूल येथे १८ मे २०२५ रोजी माजी विद्यार्थ्यांनी स्नेह मेळाव्याचे आयोजन केले होते. २००३ ला १० वीला असणारे विद्यार्थी व विद्यार्थिनी एकत्र येऊन आपल्या शाळेतल्या सुख दुःखाच्या आठवणी व्यक्त केल्या. २२ वर्षांनी एकत्र आलेले विद्यार्थी शाळेच्या आवारात रमून गेले . आपापल्या व्यवसायात ,संसारात नित्य मग्न असलेल्या या विद्यार्थ्यांच्या मनात शाळेसाठी आपण काहीतरी केले पाहिजे याची जाणीव झाली…..दुसऱ्या दिवशी सोमवारी त्यातीलच एक संवेदनशील व जाणीव असलेल्या विद्यार्थ्याने एक सुखद धक्का दिला. शाळेतल्या सोबत्यांसोबत आनंद मिळालाअसला तरी त्यातील एक दोन विद्यार्थ्याच्या मनात ,मला घडवणारी ही शाळा तिला काही अडचणी आहेत का ? ही संवेदना जन्मास आली. याच बॅचचे आज पोलीस दलात काम करणारे तत्कालीन विद्यार्थी विशाल शिंदे व सुधीर बेबले या विद्यार्थ्यांच्या मनात शाळेसाठी मदत करण्याची भावना निर्माण झाली. आणि दुसऱ्याच दिवशी शाळेतील विद्यार्थ्यांशी जिव्हाळ्याचे सबंध असणारे माजी शिक्षक सुधाकर शिंदे यांना घेऊन ते मुख्याध्यापक सुनिता वाघमारे यांना भेटले. विद्यालयाच्या एका खोलीची दुरुस्ती करण्याची गरज लक्षात घेऊन श्री.विशाल शिंदे यांनी खोलीच्या नूतनीकरणासाठी २५००० रुपयांचा चेक मुख्याध्यापक वाघमारे यांना दिला. वाघमारे यांनी विशाल शिंदे यांचे कौतुक केले व आभार मानून रयत शिक्षण संस्थेच्या प्रत्येक शाखेत माजी विद्यार्थी संघटना नोंदणी करण्याबाबत च्या परिपत्रकाची माहिती त्यांना दिली. तसेच विद्यालयाचे सर्व माजी विद्यार्थी एकत्र येऊन शाळेच्या विकासासाठी योगदान देण्याच्या बाबत आवाहन केले. माजी विद्यार्थी यांचे दातृत्व म्हणजे केवळ आर्थिक मदत नाही तर पुढील पिढीला घडविण्यासाठीची सामाजिक जबाबदारी महत्त्वाची भूमिका ठरते.ही परंपरा आपण सर्व विद्यार्थी निर्माण करत आहात ही गोष्ट निश्चितच प्रेरणादायी आणि आम्हा सर्व शिक्षकांसाठी अभिमानाची आहे असे त्या म्हणाल्या. हायस्कूलचे स्थानिक व्यवस्थापन समितीचे पदाधिकारी ,सदस्य ,शिक्षक यांनी त्यांचे अभिनंदन केले आहे .
