युवाशक्तीच्या साथीने नशामुक्त नवी मुंबईचा संकल्प
मुख्यमंत्री देवेंद्र फडणवीस यांच्या हस्ते नवी मुंबई पोलीस आयुक्तालयाच्या नशामुक्त नवी मुंबई अभियानाअंतर्गत ‘कॅम्पस कनेक्ट’ उपक्रमाचा शुभारंभ करण्यात आला. व्यसनांपासून दूर राहून विद्यार्थ्यांनी शिक्षण, क्रीडा, कौशल्यविकास आणि राष्ट्रउभारणीकडे वळावे, असे आवाहन मुख्यमंत्री फडणवीस यांनी यावेळी केले.
मुख्यमंत्री फडणवीस म्हणाले, आजच्या तरुण पिढीमध्ये अमली पदार्थांचे वाढते आकर्षण आणि त्याचे होणारे गंभीर सामाजिक, शारीरिक व मानसिक परिणाम लक्षात घेता, नवी मुंबई पोलिसांनी या उपक्रमाच्या माध्यमातून विद्यार्थ्यांपर्यंत थेट पोहोचण्याचा प्रयत्न केला आहे. महाविद्यालयीन परिसर हा युवकांच्या व्यक्तिमत्त्व विकासाचा महत्त्वाचा टप्पा असल्याने, या वयोगटात योग्य माहिती व जागरूकता निर्माण करणे हे या मोहिमेचे प्रमुख उद्दिष्ट आहे.
भारताच्या ‘डेमोग्राफिक डिव्हिडंड’चा उल्लेख करत मुख्यमंत्री फडणवीस म्हणाले, देशाची 65% युवाशक्ती ही आपली मोठी ताकद आहे. या युवाशक्तीला निष्प्रभ करण्यासाठी शत्रू राष्ट्रे आणि असामाजिक घटक तरुणांना व्यसनाच्या आहारी घालण्याचे षडयंत्र रचत आहेत. या लढाईत अमली पदार्थांची पुरवठा साखळी पूर्णपणे नेस्तनाबूत करणे आणि तरुणांमध्ये जागृती निर्माण करून मागणी संपवणे, असा सर्वांगीण दृष्टिकोन ही काळाची गरज आहे.
‘नो टू ड्रग्स’चा संदेश
स्वामी विवेकानंदांच्या विचारांचा दाखला देत, योग्य दिशेने गेलेली युवाशक्ती समाजासाठी ‘ऑक्सिजन’ बनून संजीवनी देते, असे प्रतिपादन करत मुख्यमंत्री फडणवीस म्हणाले, प्रत्येक शैक्षणिक कॅम्पस हे या लढाईचे केंद्र असून प्रत्येक विद्यार्थी या नशाविरोधी मोहिमेचा सैनिक आहे. व्यसनांपासून दूर राहून विद्यार्थ्यांनी शिक्षण, क्रीडा, कौशल्यविकास आणि राष्ट्रउभारणीकडे वळावे. व्यसनाच्या गर्तेत अडकलेल्या विद्यार्थ्यांना भेदभाव न करता व्यसनमुक्ती केंद्रांच्या माध्यमातून मदत केली जाईल.
पोलीस, महानगरपालिका, नागरिक आणि तरुणाईच्या संयुक्त प्रयत्नांतून नवी मुंबईला पूर्णपणे नशामुक्त आणि सुरक्षित बनवण्याचा संकल्प या वेळी सोडण्यात आला. तरुणाईच्या साथीने ‘सुजलाम सुफलाम’ व विकसित भारताचे स्वप्न पूर्ण होईल, असा विश्वास मुख्यमंत्री फडणवीस यांनी यावेळी व्यक्त केला.
मुख्यमंत्री फडणवीस यांच्या हस्ते व्यसनमुक्ती पुनर्वसन केंद्र व व्यसनमुक्त चित्रफितीचे लोकार्पणही करण्यात आले. तसेच, या अभियानानिमित्त आयोजित जनजागृतीपर पोस्टर्स व रील्स स्पर्धेत निवडलेल्या सर्वोत्तम प्रत्येकी तीन विद्यार्थ्यांना मुख्यमंत्र्यांच्या हस्ते प्रमाणपत्र देऊन गौरविण्यात आले.
यावेळी मंत्री गणेश नाईक, मंत्री भरत गोगावले, आमदार विक्रांत पाटील, आमदार रविंद्र फाटक, आमदार मंदा म्हात्रे, आमदार महेश बालदी व इतर मान्यवर उपस्थित होते.
