महाबळेश्वर: वेण्णा तलाव काठोकाठ भरल्याने उत्साहात साजरी झाली ‘वेण्णा माईची ओटी’
महाबळेश्वर:महाबळेश्वर शहराची तहान भागवणारा आणि पर्यटकांचे मुख्य आकर्षण असलेला प्रसिद्ध ‘वेण्णा तलाव’ मुसळधार पावसामुळे पूर्ण क्षमतेने भरला आहे. तलावाच्या या भरघोस जलसाठ्याबद्दल कृतज्ञता व्यक्त करण्यासाठी महाबळेश्वरकर दरवर्षी परंपरेनुसार ‘वेण्णा माईची ओटी’ भरण्याचा उत्सव अत्यंत उत्साहात साजरा करतात. याही वर्षी हा कार्यक्रम तितक्याच भक्तिभावाने पार पडला.
वेण्णा माईचे पूजन आणि कृतज्ञता
स्थानिक नागरिक आणि व्यावसायिक वेण्णा तलावाला ‘माते’चा दर्जा देतात. वरुण राजाची कृपा कायम राहो आणि पर्यटन हंगाम सुफल संपन्न होवो, या भावनेतून वेण्णा माईची विधीवत पूजा केली जाते. पुरोहितांच्या मंत्रोच्चारांच्या गजरात तलावाच्या काठावर वेण्णा माईला साडी, खण आणि नारळ अर्पण करून ओटी भरण्यात आली.
मान्यवरांची उपस्थिती
या प्रसंगी महाबळेश्वरचे नगराध्यक्ष सुनील शिंदे, ॲडव्होकेट संजय जंगम, रोहित ढेबे, अफजल भाई सुतार, विमलताई पार्टे, संगिता ताई वाडकर, आबा शिंदे, रवींद्रजी कुंभारदरे, तसेच महाबळेश्वर नगर परिषदेचे मुख्य लिपीक बबन जाधव,वृक्ष अधिकारी हिरवे आणि वेण्णा लेक बोट क्लबचे कर्मचारी मोठ्या संख्येने उपस्थित होते.
