गटई कामगारांना पत्र्याचे स्टॉलसाठी अर्ज करण्याचे आवाहन
सातारा दि. 30 :- महाराष्ट्र राज्यामध्ये चामडयाच्या वस्तू व पादत्राणे दुरुस्तीच्या क्षेत्रात मोठ्या प्रमाणावर अनुसूचित जाती प्रवर्गातील व्यक्ती कार्यरत असून, त्यांची उपजिविका ही चामड्याच्या वस्तू व पादत्राणे दुरुस्तीच्या क्षेत्रावर अवलंबून आहे. अनुसूचित जाती प्रवर्गातील पादत्राणे दुरुस्ती करणारे व्यावसायिक हे रस्त्याच्या कडेला उन्हातान्हात बसून आपली सेवा जनतेला देत असतात, या व्यावसायिकांना ऊन, वारा व पाऊस यांपासून संरक्षण मिळावे व त्यांची आर्थिक उन्नती व्हावी यासाठी गटई कामगारांना 100 टक्के अनुदान या तत्वावर पत्र्याचे स्टॉल वर कमाल रु. 5000/- इतके अनुदान देणे ही योजना राबविण्यात येते. तरी या योजनेचा जास्तीत जास्त गटई कामगारांनी लाभ घ्यावा.
विहित नमुन्यातील अर्ज संपूर्ण कागदपत्रांसह सहायक आयुक्त, समाजकल्याण कार्यालयात सादर करावे. सदर योजनेच्या अधिक माहितीसाठी सहायक आयुक्त, समाज कल्याण, सातारा कार्यालय, भारतरत्न डॉ. बाबासाहेब आंबेडकर सामाजिक न्याय भवन, बॉम्बे रेस्टॉरंट चौक, सातारा येथे संपर्क साधावा, असे आवाहन समाज कल्याणचे सहायक आयुक्त सुनिल जाधव यांनी केले आहे.
