यशोदा टेक्निकल कॅम्पस चे प्राध्यापक प्राध्यापक डॉ. सुभाष सुमन पीएच.डी. पदवी
सातारा : यशोदा टेक्निकल कॅम्पस, सातारा येथील प्राध्यापक डॉ. सुभाष सुमन यांनी संशोधन क्षेत्रात उल्लेखनीय यश संपादन करत इंडियन इन्स्टिट्यूट ऑफ इन्फॉर्मेशन टेक्नॉलॉजी, रांची येथून पीएच.डी. पदवी प्राप्त केली आहे. त्यांच्या या शैक्षणिक यशाबद्दल यशोदा शिक्षण संस्थेच्या वतीने त्यांचा विशेष सत्कार करण्यात आला. संस्थेचे संस्थापक अध्यक्ष प्रा. डॉ. दशरथ सगरे आणि उपाध्यक्ष डॉ. अजिंक्य सगरे यांच्या हस्ते त्यांचा गौरव करण्यात आला.
डॉ. सुभाष सुमन यांनी “परफॉर्मन्स ॲनालिसिस ऑफ इंटर-सॅटेलाइट ऑप्टिकल वायरलेस कम्युनिकेशन सिस्टिम युजिंग मशीन लर्निंग टेक्निक्स” या अत्यंत समकालीन आणि संशोधनप्रधान विषयावर आपला प्रबंध सादर केला. कृत्रिम बुद्धिमत्ता, मशीन लर्निंग, उपग्रह संप्रेषण आणि ऑप्टिकल वायरलेस कम्युनिकेशन या अत्याधुनिक तंत्रज्ञानांचा संगम साधणारे त्यांचे संशोधन भविष्यातील संप्रेषण व्यवस्थेसाठी महत्त्वपूर्ण मानले जात आहे.
आजच्या डिजिटल युगात उपग्रहांमधील जलद, सुरक्षित आणि कार्यक्षम डेटा देवाणघेवाण ही एक महत्त्वाची गरज बनली आहे. या पार्श्वभूमीवर मशीन लर्निंग तंत्रज्ञानाचा वापर करून इंटर-सॅटेलाइट ऑप्टिकल वायरलेस कम्युनिकेशन प्रणालीची कार्यक्षमता वाढविण्याबाबत त्यांनी केलेले संशोधन शैक्षणिक तसेच तांत्रिक क्षेत्रासाठी उपयुक्त ठरणार आहे. त्यांच्या संशोधनातून अवकाश तंत्रज्ञान आणि आधुनिक संप्रेषण क्षेत्रात नवीन संधी निर्माण होण्यास मदत होईल, असे मत तज्ज्ञांकडून व्यक्त करण्यात येत आहे.
सत्कार समारंभात बोलताना प्रा. डॉ. दशरथ सगरे यांनी सांगितले की, उच्च शिक्षण क्षेत्रात संशोधन ही ज्ञाननिर्मितीची सर्वात प्रभावी प्रक्रिया आहे. शिक्षकांनी संशोधनात सक्रिय सहभाग घेतल्यास विद्यार्थ्यांमध्ये नवोपक्रमशीलता, वैज्ञानिक दृष्टिकोन आणि संशोधनाची आवड निर्माण होते. डॉ. सुभाष सुमन यांचे यश हे संपूर्ण यशोदा परिवारासाठी अभिमानास्पद असून त्यांच्या कार्यातून इतर शिक्षक आणि विद्यार्थ्यांनाही प्रेरणा मिळेल.
यावेळी डॉ. अजिंक्य सगरे यांनी आपल्या मनोगतात सांगितले की, यशोदा टेक्निकल कॅम्पसमध्ये गुणवत्तापूर्ण शिक्षणाबरोबरच संशोधन आणि नवोपक्रमाला विशेष प्रोत्साहन दिले जाते. राष्ट्रीय आणि आंतरराष्ट्रीय स्तरावरील संशोधन कार्यामध्ये शिक्षकांचा सहभाग वाढावा यासाठी संस्था सातत्याने प्रयत्नशील आहे. डॉ. सुभाष सुमन यांनी मिळविलेली पीएच.डी. पदवी ही संस्थेच्या संशोधनाभिमुख वातावरणाची साक्ष देणारी आहे. यावेळी चार्टर्ड अकाउंटंट राजेश कासार, रजिस्ट्रार गणेश सुरवसे, डॉ. अमृता मोहिते उपस्थित होते.
यशोदा टेक्निकल कॅम्पसमध्ये अभियांत्रिकी, फार्मसी, व्यवस्थापन, संगणकशास्त्र, वास्तुशास्त्र आणि इतर विविध शाखांमधील विद्यार्थ्यांना आधुनिक शिक्षणासोबत संशोधनाची संधी उपलब्ध करून दिली जाते. त्यामुळे संस्थेतील शिक्षक आणि विद्यार्थी विविध राष्ट्रीय व आंतरराष्ट्रीय परिषदांमध्ये, संशोधन नियतकालिकांमध्ये तसेच नाविन्यपूर्ण प्रकल्पांमध्ये उल्लेखनीय कामगिरी करत आहेत.
डॉ. सुभाष सुमन यांच्या या यशाबद्दल संस्थेतील सर्व प्राध्यापक, कर्मचारी, विद्यार्थी आणि माजी विद्यार्थ्यांनी त्यांचे अभिनंदन केले. त्यांच्या संशोधन कार्यामुळे यशोदा टेक्निकल कॅम्पसच्या शैक्षणिक आणि संशोधन परंपरेला नवे बळ मिळाले असून भविष्यातही ते संशोधन क्षेत्रात अधिक भरीव योगदान देतील, असा विश्वास व्यक्त करण्यात आला.
