कराड पोलिसांचा जबरदस्त धडाका; आंतरराज्य घरफोड्या टोळीतील सराईत गुन्हेगार जेरबंद, १५.२२ लाखांचा मुद्देमाल जप्त
कराड (ज्ञानेश्वर शेवाळे )कराड शहर पोलिसांनी एप्रिल २०२६ मध्ये घडलेल्या घरफोडीच्या मालिकेचा यशस्वी छडा लावत आंतरराज्य स्तरावर गुन्हे करणाऱ्या सराईत आरोपीला अटक करून मोठे यश संपादन केले आहे.मलकापूर व सैदापूर परिसरात झालेल्या घरफोडीच्या घटनांमुळे नागरिकांमध्ये भीतीचे वातावरण निर्माण झाले होते. या पार्श्वभूमीवर पोलीस अधीक्षक तुषार दोषी, अपर पोलीस अधीक्षक वैशाली कडुकर तसेच उपविभागीय पोलीस अधिकारी राजश्री पाटील यांच्या मार्गदर्शनाखाली वरिष्ठ पोलीस निरीक्षक दत्तात्रय दराडे यांनी तपासाला गती दिली.
गुन्हे प्रकटीकरण शाखेचे पोलीस उपनिरीक्षक निखील मगदूम व त्यांच्या पथकाने तांत्रिक विश्लेषण, गुप्त माहिती व सीसीटीव्ही फुटेजच्या आधारे तपास करत आरोपीचा माग काढला. या तपासातून लक्ष्मण रावसाहेब सुतार (रा. लिंगनूर, ता. मिरज, जि. सांगली) याला अटक करण्यात आली. सदर आरोपीवर सातारा, सांगली, कोल्हापूर तसेच कर्नाटक राज्यातील बेळगाव जिल्ह्यात मिळून सुमारे २० घरफोडीचे गुन्हे दाखल असल्याचे निष्पन्न झाले आहे.
ठळक मुद्दे :
मलकापूर व सैदापूर येथील घरफोडीचे गुन्हे उघड
लक्ष्मण रावसाहेब सुतार अटकेत आंतरराज्य स्तरावर गुन्हे करणारा सराईत आरोपी सीसीटीव्ही व तांत्रिक तपासामुळे पोलिसांना यश सोने-चांदीचे दागिने व चारचाकी वाहन जप्त
एकूण ₹१५,२२,५०० मुद्देमाल हस्तगत
आरोपीकडून चोरीतील सोने-चांदीचे दागिने तसेच गुन्ह्यात वापरलेली चारचाकी गाडी असा एकूण १५ लाख २२ हजार ५०० रुपयांचा मुद्देमाल जप्त करण्यात आला आहे.ही कारवाई पोलीस निरीक्षक विजय गोडसे यांच्या सहकार्याने पो.उ.नि. निखील मगदूम व त्यांच्या पथकातील सतीश पाटील, संदीप कुंभार, सज्जन जगताप, अनिल स्वामी, धीरज कोरडे, दिग्विजय सांडगे, निलेश विभुते, अमोल देशमुख, मुकेश मोरे, मोहसीन मोमीन, आनंदा जाधव, महेश पवार, सोनाली पिसाळ यांनी यशस्वीरीत्या पार पाडली.
या कारवाईमुळे कराड शहरातील घरफोडीच्या गुन्ह्यांवर आळा बसण्यास मदत होणार असून, नागरिकांमध्ये सुरक्षिततेची भावना निर्माण झाली आहे.
