वैज्ञानिक संशोधन क्षेत्रात डॉ. वसंत गोवारीकराचे मोलाचे योगदान-श्रीरंग काटेकर
गौरीशंकर च्या डॉ पी व्ही सुखात्मे स्कूल मध्ये डॉ वसंत गोवारीकर यांची ९३ वी जयंती उत्साहात साजरी
लिंब-भारत भूमीचे सुपुत्र थोर वैज्ञानिक व आत्मनिर्भरतेचा ध्यास घेऊन वाटचाल करणारे थोर शास्त्रज्ञ डॉ. वसंत गोवारीकर यांनी भारतीय वैज्ञानिक क्षेत्रात मोलाचे योगदान दिले आहे असे मत गौरीशंकर चे जनसंपर्क अधिकारी श्रीरंग काटेकर यांनी व्यक्त केले. ते लिंब या जि सातारा येथील गौरीशंकरचे डॉ पी व्ही सुखात्मे इंग्लिश मिडियम स्कूल लिंब येथे शास्त्रज्ञ डॉ वसंत गोवारीकर यांच्या ९३ व्या जयंतीनिमित्त आयोजित कार्यक्रमात बोलत होते. यावेळी स्कूलचे प्रभारी प्राचार्य घनश्याम चव्हाण, नितीन शिवथरे, राकेश खोपडे व शिक्षक वर्ग आदी प्रमुख उपस्थित होते. श्रीरंग काटेकर पुढे म्हणाले की प्रतिकूल परिस्थितीत भारतीय वैज्ञानिक संशोधन क्षेत्राला नवी उभारी देताना डॉ. वसंत गोवारीकर यांनी स्वदेशी हवामान अंदाज मॉडेल विकसित करून देशांतर्गत विज्ञान क्षेत्रात मोठी क्रांती केली आहे. अवकाश संशोधन हवामान शास्त्र व लोकसंख्या या क्षेत्रात त्यांनी आपल्या कार्याचा ठसा उमटविला आहे. यावेळी प्रभारी प्राचार्य घनश्याम चव्हाण म्हणाले की स्पर्धेच्या युगात वैज्ञानिक दृष्टिकोन हाच खरा प्रगतीचा मार्ग असून डॉ. वसंत गोवारीकर यांनी भारतीय विज्ञान क्षेत्राला नवी दिशा दिली आहे. प्रारंभी थोर शास्त्रज्ञ डॉ. वसंत गोवारीकर यांच्या प्रतिमेचे पूजन करण्यात आले यावेळी सर्व शिक्षकांनी वैज्ञानिक दृष्टिकोनातून भविष्यातील वाटचाल करण्याचा निर्धार केला. कार्यक्रमाचे प्रास्ताविक व आभार नितीन शिवथरे यांनी केले.
