जनसेवेची ओळख असलेले नगराध्यक्ष दिलीपभाऊ बगाडे ‘सातारा प्राईड पुरस्कार 2026’चे मानकरी
पाचगणी : नगराध्यक्षपदापर्यंतचा संघर्षपूर्ण आणि प्रेरणादायी प्रवास करणारे पाचगणीचे नगराध्यक्ष दिलीपभाऊ बगाडे यांना सातारा मीडिया सेव्हन तर्फे दिला जाणारा ‘सातारा प्राईड पुरस्कार 2026’ जाहीर झाला आहे. त्यांच्या सामाजिक कार्याची आणि जनतेसाठी केलेल्या योगदानाची दखल घेत हा सन्मान जाहीर करण्यात आला आहे.
सन १९७९ साली जकात नाका शिपाई म्हणून काम करत असताना दिलीप बगाडे यांनी आपल्या नोकरीकडे केवळ उपजीविकेचे साधन म्हणून पाहिले नाही. सामान्य कर्मचारी म्हणून काम करताना प्रशासनाची कार्यपद्धती, तसेच सर्वसामान्य नागरिकांच्या अडचणी त्यांनी जवळून अनुभवल्या. काम हेच खरे नेतृत्व ही शिकवण त्यांच्या मनात याच काळात रुजली.
साधी राहणी, शांत स्वभाव आणि सर्वांशी आपुलकीने संवाद साधण्याची वृत्ती यामुळे ते अल्पावधीतच लोकांच्या मनात स्थान निर्माण करू शकले. सामाजिक कार्यातून त्यांनी जनतेच्या प्रश्नांशी आपले नाते जोडले. सामान्य माणसाच्या वेदना, गरजा आणि अपेक्षा समजून घेत त्यांनी सार्वजनिक आणि राजकीय जीवनात पाऊल टाकले.
नगरसेवक, उपनगराध्यक्ष ते नगराध्यक्ष असा त्यांचा प्रवास हा केवळ पदांचा टप्पा नसून जनतेच्या विश्वासातून उभा राहिलेला प्रवास आहे.
नगराध्यक्षपदाची जबाबदारी स्वीकारताना त्यांनी केवळ पद स्वीकारले नाही, तर पाचगणीकरांच्या अपेक्षा आपल्या खांद्यावर घेतल्या. शहराच्या विकासाला नवी दिशा देण्याचा त्यांनी संकल्प केला. त्यांच्या मते विकास म्हणजे केवळ रस्ते, इमारती किंवा योजना नव्हे, तर नागरिकांच्या जीवनात सकारात्मक आणि आश्वासक बदल घडवणे होय.
आज मोठे पद आणि जबाबदाऱ्या मिळाल्यानंतरही त्यांच्या स्वभावातील साधेपणा कायम आहे. मितभाषी स्वभाव, साधी राहणी आणि समोरच्या व्यक्तीचे म्हणणे मनापासून ऐकून घेण्याची सवय हे गुण त्यांना वेगळे ठरवतात.
त्यांच्या याच कार्याची दखल घेत सातारा मीडिया सेव्हन तर्फे दिला जाणारा’ सातारा प्राईड पुरस्कार 2026′ त्यांना जाहीर करण्यात आला असून विविध स्तरांतून त्यांचे अभिनंदन होत आहे.
