लाडक्या बहिणींसाठी मोठी बातमी! e-KYC दुरुस्तीसाठी पुन्हा संधी, ही शेवटची तारीख
ज्यांनी E KYC केलं पण काही चुका झाल्यामुळे पैसे मिळू शकले नाहीत त्यांना या चुका सुधारण्यासाठी पुन्हा एकदा शेवटची संधी देण्यात आली आहे. मुख्यमंत्री माझी लाडकी बहीण योजनेच्या लाभार्थ्यांसाठी राज्य सरकारने एक अत्यंत महत्त्वाचा निर्णय घेतला आहे. ज्या महिलांनी अर्ज भरून आणि e-KYC प्रक्रिया पूर्ण करूनही तांत्रिक कारणांमुळे त्यांच्या खात्यात अद्याप पैसे जमा झालेले नाहीत. अशा सर्व महिलांना आता आपली e-KYC माहिती दुरुस्त करण्यासाठी ३१ मार्च २०२६ पर्यंत पुन्हा एकदा संधी देण्यात आली.
योजनेसाठी अर्ज केल्यानंतर अनेक बहिणींनी e-KYC पूर्ण केले होते. मात्र, आधार कार्डवरील नाव आणि अर्जातील नावातील तफावत, बँक खात्याशी आधार लिंक नसणे किंवा बायोमेट्रिक त्रुटींमुळे हजारो महिलांचे लाभ रखडले आहेत. महिला व बालविकास विभागाने हे निदर्शनास आणून दिले आहे की, जोपर्यंत e-KYC मधील त्रुटी दूर होत नाहीत, तोपर्यंत डीबीटी (DBT) द्वारे पैसे पाठवणे शक्य होत नाही.
३१ मार्चपर्यंत दुरुस्तीची मुदत
ज्या महिलांच्या अर्जात त्रुटी आहेत किंवा ज्यांना अद्याप लाभ मिळालेला नाही, त्यांच्यासाठी ऑनलाइन पोर्टलवर दुरुस्तीची सुविधा उपलब्ध करून देण्यात आली आहे. ही प्रक्रिया पूर्ण करण्यासाठी सरकारने ३१ मार्च २०२६ ही शेवटची तारीख निश्चित केली आहे. महिलांनी आपल्या जवळच्या नागरी सुविधा केंद्रावर (CSC) जाऊन किंवा स्वतः अधिकृत पोर्टलवरून आपली माहिती तपासून त्यामध्ये आवश्यक बदल करून घ्यावेत.
“राज्यातील प्रत्येक पात्र लाडक्या बहिणीला या योजनेचा लाभ मिळावा, हीच महिला व बालविकास विभागाची प्रामाणिक भूमिका आहे,” असे प्रशासनाकडून स्पष्ट करण्यात आले आहे. तांत्रिक कारणांमुळे कोणत्याही बहिणीचा हक्क हिरावला जाऊ नये, यासाठीच ही मुदतवाढ आणि दुरुस्तीची संधी देण्यात आली आहे. लाडक्या बहिणींनी या सुवर्णसंधीचा लाभ घेऊन मुदतीपूर्वी आपली e-KYC प्रक्रिया दुरुस्त करून घ्यावी, जेणेकरून पुढील हप्ते विनाअडथळा बँक खात्यात जमा होतील.
१. आधार अपडेट: तुमचे आधार कार्ड बँक खात्याशी सीडेड असल्याची खात्री करा.
२. मोबाईल नंबर: आधारशी लिंक असलेला मोबाईल नंबर चालू ठेवा, जेणेकरून OTP मिळण्यास अडचण येणार नाही.
३. ऑनलाइन पोर्टल: योजनेच्या अधिकृत वेबसाईटवर जाऊन आपल्या अर्जाची स्टेटस तपासा.
