हिल रेंज एज्युकेशन सोसायटीच्या सांस्कृतिक महोत्सवात विद्यार्थ्यांचा कलाविष्कार; सहसचिव आनंदराव पाटील यांची प्रमुख उपस्थिती
भिलार -‘हिल रेंज एज्युकेशन सोसायटी’च्या वतीने आयोजित करण्यात आलेला वार्षिक सांस्कृतिक महोत्सव अत्यंत उत्साहात आणि दिमाखदार सोहळ्यात संपन्न झाला. या कार्यक्रमाचे विशेष आकर्षण म्हणजे केंद्रीय शालेय शिक्षण विभागाचे सहसचिव मा.आनंदराव पाटील यांची लाभलेली प्रमुख उपस्थिती. त्यांच्या हस्ते दीपप्रज्वलन करून कार्यक्रमाची अधिकृत सुरुवात करण्यात आली.
सांस्कृतिक वारशाचे दर्शन
कार्यक्रमाच्या सुरुवातीला विद्यार्थ्यांनी ईशस्तवन आणि स्वागतगीत सादर केले. यंदाच्या महोत्सवाची संकल्पना ‘भारतीय संस्कृती आणि आधुनिक शिक्षण’ अशी होती. या संकल्पनेवर आधारित विविध गुणदर्शनपर कार्यक्रम सादर करण्यात आले. लहान गटातील मुलांनी सादर केलेल्या कोळीगीताने आणि लेझिम पथकाने उपस्थितांची मने जिंकली, तर मोठ्या गटातील विद्यार्थ्यांनी ‘पर्यावरण रक्षण’ , शिवाजी महाराज व संभाजी महाराज यांच्यावरील पटनाट्य व ‘डिजिटल इंडिया’ या विषयांवर प्रभावी मूकनाट्ये सादर केली.
आपल्या मार्गदर्शपर भाषणात सहसचिव आनंदराव पाटील यांनी संस्थेच्या उपक्रमांचे तोंडभरून कौतुक केले. ते म्हणाले की, “शिक्षण म्हणजे केवळ पदव्या मिळवणे नसून, विद्यार्थ्यांच्या सुप्त गुणांना वाव देणे आणि त्यांच्यात मानवी मूल्यांची रुजवण करणे होय. हिल रेंज एज्युकेशन सोसायटी ज्या पद्धतीने ग्रामीण आणि शहरी भागातील विद्यार्थ्यांच्या कलागुणांना व्यासपीठ मिळवून देत आहे, ते कौतुकास्पद आहे.” त्यांनी केंद्र सरकारच्या नवीन शैक्षणिक धोरणातील महत्त्वाच्या मुद्द्यांवरही प्रकाश टाकला.
यावेळी शैक्षणिक, क्रीडा आणि कला क्षेत्रात उल्लेखनीय कामगिरी करणाऱ्या विद्यार्थ्यांचा मा. आनंदराव पाटील यांच्या हस्ते विशेष सन्मान करण्यात आला. संस्थेच्या वतीने देण्यात येणारा ‘आदर्श विद्यार्थी’ पुरस्कार यंदा इयत्ता दहावीच्या विद्यार्थ्याला प्रदान करण्यात आला. पालकांनी मोठ्या संख्येने उपस्थित राहून विद्यार्थ्यांच्या सादरीकरणाला दाद दिली.
कार्यक्रमाला संस्थेचे अध्यक्ष, नितीन भिलारे ,सचिव जतिन भिलारे, राजेंद्र शेठ राजपुरे, संजूबाबा गायकवाड, तेजस्विनी भिलारे, राजेंद्र भिलारे व सर्व संचालक मंडळ, मुख्याध्यापक, शिक्षक आणि शिक्षकेतर कर्मचारी उपस्थित होते. संस्थेच्या अध्यक्षांनी आपल्या प्रास्ताविकात संस्थेच्या वाटचालीचा आढावा घेतला आणि भविष्यातील शैक्षणिक प्रकल्पांची माहिती दिली. कार्यक्रमाचा शेवट राष्ट्रगीताने झाला.
विद्यार्थ्यांच्या कलागुणांना प्रोत्साहन देणारा हा सोहळा परिसरातील नागरिकांसाठी एक पर्वणीच ठरला. शिस्तबद्ध नियोजन आणि विद्यार्थ्यांचा उत्साह यामुळे या कार्यक्रमाची चर्चा सर्वत्र होत आहे.
