आरोग्य, अवयवदान आणि वृक्षसंवर्धनाचा संगम – ‘आपली फलटण मॅरेथॉन २०२५’ सुरूवातीस सज्ज!
आपली फलटण मॅरेथॉन २०२५” ला उत्स्फूर्त प्रतिसाद
२२०० हून अधिक स्पर्धकांची नोंदणी; मीरा बोरवणकर यांच्या हस्ते शुभारंभ
फलटण (प्रतिनिधी) –जोशी हॉस्पिटल प्रा. लि. आणि रोबोटिक्स सेंटर, फलटण यांच्या संयुक्त विद्यमाने प्रतिवर्षीप्रमाणे यावर्षीही “आपली फलटण मॅरेथॉन २०२५” चे आयोजन रविवार, दि. १२ ऑक्टोबर रोजी करण्यात आले आहे. या स्पर्धेला यंदा विक्रमी प्रतिसाद लाभला असून, तब्बल २२०० पेक्षा अधिक स्पर्धकांनी नावनोंदणी केली आहे. यामध्ये सुमारे ५०० ज्येष्ठ नागरिकांचा सहभाग विशेष ठरणार आहे, अशी माहिती डॉ. प्रसाद जोशी आणि डॉ. प्राची जोशी यांनी दिली.
गेल्या आठ वर्षांपासून ही मॅरेथॉन आरोग्यदायी जीवनशैलीचा संदेश देत लोकांमध्ये व्यायामाची सवय लागावी, या उद्देशाने आयोजित केली जाते. विविध वयोगटांतील स्त्री-पुरुष, तरुण आणि वृद्ध यांचा वाढता सहभाग समाधानकारक असल्याचे डॉ. प्रसाद जोशी यांनी सांगितले.
या वर्षी मॅरेथॉनच्या माध्यमातून अवयवदान जनजागृती आणि वृक्षारोपण-संवर्धन मोहिमेची सुरुवात करण्यात आली आहे. याअंतर्गत यशस्वी १,००० स्पर्धकांना देशी वृक्षांची रोपे देऊन ती सलग तीन वर्षे संवर्धन करणाऱ्यांना पुढील मॅरेथॉनमध्ये विनामूल्य सहभाग दिला जाणार आहे.
दरवर्षीप्रमाणे यावर्षीही बक्षीस वितरण सोहळ्यासाठी मान्यवरांना आमंत्रित करण्यात आले असून, महाराष्ट्रातील पहिल्या महिला पोलीस आयुक्त मीरा बोरवणकर या प्रमुख पाहुण्या म्हणून उपस्थित राहणार आहेत. त्यांच्याच हस्ते सकाळी ६ वाजता सजाई गार्डन कार्यालय, विमानतळ रोड, फलटण येथून मॅरेथॉनचा शुभारंभ होणार आहे.
मॅरेथॉनमध्ये एकूण तीन विभागांत स्पर्धा होणार असून, पुरुष व महिला या दोन्ही गटांतील प्रत्येकी पहिल्या तीन विजेत्यांना एकूण १८ बक्षिसे दिली जातील. पहिल्या क्रमांकास ₹१०,०००, दुसऱ्या क्रमांकास ₹७,००० आणि तिसऱ्या क्रमांकास ₹५,००० अशी बक्षिसांची रचना आहे.
सर्व सहभागींसाठी आकर्षक फिनिशर मेडल आणि मॅरेथॉन किट दिली जाणार आहे, ज्यात टाइम चिप बिब, टी-शर्ट, एनर्जी बार, टोपी आणि भेटवस्तूचा समावेश आहे. नावनोंदणी केलेल्या सर्वांनी ९, १० व ११ ऑक्टोबर रोजी सकाळी १० ते सायंकाळी ५ दरम्यान जोशी हॉस्पिटल, फलटण (चौथा मजला) येथे आपले किट घ्यावेत, असे आवाहन आयोजकांनी केले आहे.
या वर्षीच्या स्पर्धेत —
जोशपूर्ण (१८-३० वर्षे) गटात २००,
सळसळती तरुणाई (३१-४५ वर्षे) गटात ४००,
प्रगल्भ प्रौढ (४६-६४ वर्षे) गटात ५००,
अनुभवी ज्येष्ठ (६५ वर्षांवरील) गटात ४०० स्पर्धक सहभागी होत आहेत.
वयोगटानुसार ३ ते १५ कि.मी. अंतराच्या मॅरेथॉन शर्यतींचे आयोजन करण्यात आले आहे. विशेष म्हणजे, रोबोटिक्स यंत्रणेद्वारे गुडघ्यांची शस्त्रक्रिया झालेल्या ९०० जणांसाठी १ कि.मी. वॉकाथॉन आयोजित करण्यात आले असून, त्यांचा उत्साहही विशेष लक्षवेधी ठरणार आहे.
