प्रा.अजिंक्य सगरे यांची अखिल भारतीय मराठी साहित्य संमेलन स्वागत समिती सदस्यपदी नियुक्ती
सातारा – मराठी भाषा, साहित्य व संस्कृतीच्या जतन-प्रसारासाठी सातत्याने योगदान देणारे, यशोदा ग्रुप ऑफ इन्स्टिट्यूट सातारा, चे उपाध्यक्ष प्रा. अजिंक्य सगरे यांची अखिल भारतीय मराठी साहित्य संमेलनाच्या स्वागत समितीवर सदस्य म्हणून प्रतिष्ठेची नियुक्ती झाली आहे. २०२६ साली होणाऱ्या या ऐतिहासिक संमेलनाच्या निमित्ताने विविध क्षेत्रातील प्रतिष्ठित व्यक्तींना या समितीत स्थान देण्यात आले असून, स्वागत अध्यक्ष ना. श्रीमंत छत्रपती शिवेंद्रसिंहराजे भोसले आणि कार्याध्यक्ष श्री विनोद कुलकर्णी यांच्याद्वारे करण्यात आलेली प्रा .अजिंक्य सगरे यांची निवड ही साताऱ्यासाठी अभिमानाची बाब मानली जात आहे.
अखिल भारतीय मराठी साहित्य संमेलन हे मराठी साहित्यविश्वातील सर्वोच्च व्यासपीठ मानले जाते. या संमेलनात संपूर्ण महाराष्ट्रातून तसेच भारता सह जगाच्या कानाकोपऱ्यातून साहित्यिक, कवी, समीक्षक, लेखक, साहित्यप्रेमी आणि मराठी संस्कृतीचे जतन करणारे मान्यवर एकत्र येतात. संमेलनाच्या यशस्वी आयोजनासाठी स्वागत समितीची भूमिका महत्त्वाची मानली जाते. या समितीत स्थान मिळणे ही प्रतिष्ठेची बाब असून मराठी साहित्यसेवेचा सन्मान मानला जातो.
प्रा. अजिंक्य सगरे हे उच्च शिक्षण क्षेत्रात दशकांहून अधिक काळ कार्यरत असून त्यांनी अध्यापन, संशोधन, शैक्षणिक धोरण, तसेच सामाजिक उपक्रमांद्वारे उल्लेखनीय कामगिरी केली आहे. विद्यार्थ्यांना नव्या तंत्रज्ञानाशी जोडणे, तसेच ग्रामीण विद्यार्थ्यांना दर्जेदार शिक्षणाची संधी उपलब्ध करून देण्याचे कार्य त्यांनी केले आहे. शैक्षणिक व्यासपीठाबरोबरच सांस्कृतिक आणि सामाजिक क्षेत्रातही त्यांचा सक्रिय सहभाग राहिला आहे.
त्यांच्या या नियुक्तीमुळे सातारा जिल्ह्यातील शिक्षण तसेच साहित्यप्रेमींमध्ये आनंदाची लाट पसरली आहे. मराठी साहित्याच्या उन्नतीसाठी कार्य करण्याची नवी संधी मिळाल्याचे समाधान प्रा. सगरे यांनी व्यक्त केले. “अखिल भारतीय मराठी साहित्य संमेलन ही मराठी अस्मितेची पर्वणी आहे. या संमेलनाच्या स्वागत समितीत कार्य करण्याची संधी मिळाल्याने मी अभिमानित आहे. साताऱ्यातील साहित्यिक परंपरा आणि संस्कृती यांना अधिक व्यापक स्तरावर मांडण्यासाठी ही संधी उपयोगात आणेन,” असे ते म्हणाले.
संमेलनाच्या निमित्ताने विविध साहित्यिक चर्चा, कवी संमेलन, पुस्तक प्रकाशन, सांस्कृतिक कार्यक्रम, नाट्यप्रयोग आदींचे आयोजन होणार आहे. मराठी भाषेच्या जतनासाठी हे संमेलन महत्त्वाचे पाऊल मानले जाते. प्रा.अजिंक्य सगरे यांच्या योगदानामुळे साताऱ्यातील शैक्षणिक व सांस्कृतिक वारसा संमेलनाद्वारे व्यापक पातळीवर पोहोचेल, असा विश्वास व्यक्त केला जात आहे.
अखिल भारतीय मराठी साहित्य संमेलन ही मराठी अस्मिता आणि संस्कृतीची पर्वणी आहे. स्वागत समितीत कार्य करण्याची संधी मिळाल्याने मला अभिमान वाटतो. साताऱ्याच्या साहित्यिक परंपरेला या व्यासपीठावर स्थान मिळवून देण्यासाठी मी प्रयत्नशील राहीन. शैक्षणिक क्षेत्राबरोबरच सांस्कृतिक चळवळीतही योगदान देण्याची ही सुवर्णसंधी आहे. मराठी भाषेच्या संवर्धनासाठी समाजातील प्रत्येक घटकाने सक्रिय सहभाग घ्यावा, हीच अपेक्षा.
प्रा.अजिंक्य सगरे, उपाध्यक्ष-यशोदा ग्रुप ऑफ इन्स्टिट्यूट सातारा
